Láigobargi álggahanalmmuhus – skovvi ja deavdinráva (6106)

Láigobargi álggahanalmmuhus (TULOR 6106) addo olgoriikkalaš láigobargis gean olgoriikkalaš fitnodat lea láigohan barggu barggaheaddjái, mii lea Suomas. Almmuhusa galgá addit das fuolakeahttá, man guhká bargu bistá.

Dárkkis Vearrohálddahusas dárkilut dieđuid das, makkár diliin almmuhusa galgá addit / Tarkista Verohallinnon ohjeista, missä tilanteissa ilmoitus on annettava

Atte báberalmmuhusa maŋimustá 8. kaleandarbeaivve siste vuosttas bálkámáksinbeaivve maŋŋá.

Dállodoalut ja jápminbeasit, mat eai leat merkejuvvon Vearrohálddahusa bargoaddiid registarii, sáhttet addit almmuhusa maŋimustá bálkámáksinbeaivvis čuovvovaš mánotbaji 8. beaivve.

Almmut dárbbu mielde maid bálkkáid ja eará máksojuvvon mávssuid bálkádiehtoalmmuhusain:

Deavdinráva – Viiddes bálkádiehtoalmmuhus (6104)

Oahpásmuva maid eará sámegielat rávvagiidda:

Deavdinráva – Bálkádiehtoalmmuhus (6101)

Deavdinráva – Bargoaddi sierraalmmuhus (6103)

Deavdinráva – Dieđut riikkaidgaskasaš bargamis (6105)

Viečča skovi

Vállje skovi máksinbeaivvi mielde. Ovdamearkka dihte jos máksinbeaivi lea jagi 2024 áigge, geavat jagi 2024 skovi. Jos vuiget ovdal dahkkon almmuhusa, geavat gažaldatvuloš jagi skovi.

Máhca suomagielat rávvagii ja viečča skovi: Láigobargi álggahanalmmuhus / Vuokratyöntekijän aloittamisilmoitus (6106)

Lonuheamen suomagielat siiddu giela fidnet skovi ja deavdinrávvaga suoma-, ruoŧa- dahje eaŋgalsgillii.

Deavdinráva – láigobargi álggahanalmmuhus

Deavdde skovi fuolalaččat. Jos almmuhus lea devdojuvvon boastut dahje dieđut váilot, almmuhus hilgojuvvo. Hilgojuvvon almmuhus ii vurkejuvvo boahtoregistarii.

Jos dárbbašat dárkilut dieđuid sierralágan almmuhandiliin, oahpásmuva rávvagiidda:

Riikkaidgaskasaš dilit boahtoregistaris / Kansainväliset tilanteet tulorekisterissä

Dárkilis boahtoregistara rávvagat / Yksityiskohtaiset tulorekisterin ohjeet

Maid áššehasbálvalusamet veahkeha almmuheapmái laktáseaddji gažaldagain:

Áššehasbálvalusa oktavuohtadieđut / Asiakaspalvelun yhteystiedot

Deavdde almmuhussii čuovvovaš dieđuid

• Almmuhusa dovddaldatdieđut
• 1. Máksi
• 2. Ovddasteaddji
• 3. Boađuoažžu
• 4. Árvvoštallan bálkás ja barganáigi Suomas
• 5. Suopmelaš barggu dagaheaddji
• 6. Beaivi ja vuolláičálus

Almmuhusa dovddaldatdieđut

Deavdde skovi juohke siiddu badjeoassái almmuhusa dovddaldatdieđuid. Dovddaldatdieđut galget leat ovttaláganat buot skovi siidduin. Dovddaldatdieđut leat:

• doaibmabiju tiipa
• bálkámáksinmánotbadji
• almmuhanbeaivi
• mávssu máksi almmuhančujuhus.

Doaibmabiju tiipa

Ceahkas, leago gažaldagas ođđa almmuhus, buhttedeaddji almmuhus vai almmuhusa fámuhuhttin. Sáhtát válljet dušše ovtta doaibmabiju tiippa. Diehtu lea bákkolaš.

Ođđa almmuhus lea gažaldagas dalle, go attát dieđu láigobargi bargama álggaheamis vuosttas geardde.

Buhttedeaddji almmuhus addojuvvo, go ovddit almmuhusa galgá vuiget. Buhttedeaddji almmuhusas galgá addit buot dieđuid ođđasis, nappo ođđa ja rievdan dieđuid lassin galgá addit maid ovddit almmuhusas leamašan rivttes dieđuid. Buhttedeaddji almmuhusas galgá addit ovddit almmuhusa almmuhančujuhusa.

Almmuhusa fámuhuhttin válljejuvvo, go ovddit addojuvvon almmuhus fámuhuhttojuvvo ollásit. Fámuhuhttima oktavuođas reahkká, ahte almmuha doaibmabiju tiippa lassin mávssu máksi dovddaldaga ja ovddit almmuhusa almmuhančujuhus, man vuođul fámuhuhttin čujuha rivttes almmuhussii. Almmuhusa gánneha fámuhuhttit easka dalle, go ođđa almmuhus lea addojuvvon.

Vaikko dieđuid vuigen boahtoregistaris dahkkojuvvo dábálaččat buhttejeaddji almmuhusain, leat dihto dáhpáhusat, main dieđuid ii sáhte vuiget buhttedeaddji almmuhusain. Dan sadjái ovdal addojuvvon almmuhusa galgá fámuhuhttit ja dan maŋŋá galgá addit ođđa almmuhusa rivttes dieđuiguin. Dákkáraš dáhpáhusat leat ovdamearkka dihte:

• almmuhanbeaivvi vuigen
• bálkámáksinbaji vuigen
• mávssu máksi ja boađuoažžu áššehasdovddaldagaid vuigen
• boađuoažžu riegádanáiggi vuigen.

Bálkámáksinbadji

Almmut bálkámáksinbaji álgo- ja nohkanbeaivvi. Almmut álgo- ja nohkanbeaivve hámis bbmmjjjj, ovdamearkka dihte 01052022–31052022. Bálkámáksinbadji lea áigodat, mas bálká máksojuvvo. Diehtu lea bákkolaš.

Almmuhanbeaivi

Merke almmuhanbeaivvi hámis bbmmjjjj. Ovdamearkka dihte 15.5.2022 addon almmuhusa beaivemearri almmuhuvvo hámis 15052022. Diehtu lea bákkolaš.

Mávssu máksi almmuhančujuhus

Mávssu máksi almmuhančujuhus spesifisere máksi addin bálkádiehtoalmmuhusaid. Jos hábmet čujuhusa ieš, dat galgá leat earálágan juohkehaš ođđa almmuhusas. Dán čuoggá sáhttá guođđit maid guorusin, dalle boahtoregisttar hábme máksi almmuhančujuhusa du beales. Dalle almmuhančujuhus sáddejuvvo reiven dan čujuhussii, mii máksái lea merkejuvvon álbmot- dahje fitnodatdiehtovuogádahkii.

Jos addát ođđa almmuhusa iige máksis leat dovddaldat, ale atte almmuhančujuhusa muhto guođe čuoggá álo guorusin.

Almmuhančujuhus lea dehalaš, dasgo seamma almmuhančujuhusa galgá geavahit dalle, jos almmuhusas leat leamaš feaillat ja dan galgá vuiget. Almmá almmuhančujuhusa haga buhttedeaddji dahje fámuhuhtti almmuhusa ii boahtoregistaris sáhte čujuhit dan almmuhussii, maid háliida vuiget. Dan dihte mávssu máksi almmuhančujuhus lea bákkolaš diehtu, jos vuiget ovddit almmuhusa dahje fámuhuhtát dan.

Almmuhančujuhus sáhttá leat eanemustá 40 mearkka guhkkosaš. Dat sáhttá sisttisdoallat sihke bustávaid ja nummiriid muhto ii gaskamearkkaid. Dohkálaš mearkkat leat nummirat 0–9, bustávat a–z ja A–Z sihke sierramearkkat”_” ja ”-”. Fuomáš, ahte bustávat å, ä ja ö eai leat dohkálaš mearkkat.

1. Máksi

Almmut máksi FS-dovddaldaga ja fitnodaga nama. Jos máksi lea lunddolaš persovdna, almmut ovda- ja sohkanama ja suopmelaš persovdnadovddaldaga. Merke persovdnadovddaldaga dahje FS-dovddaldaga almmuhussii ollislažžan. Ale čále diehtogieddái dovddaldaga lassin eará dieđuid. Diehtu lea bákkolaš.

Jos suopmelaš FS-dovddaldat dahje persovdnadovddaldat ii leat, almmut máksi nama, čujuhusa ja olgoriikkalaš dovddaldaga dieđuid. Almmut juogo lagasčujuhusa dahje boastabovssa. Jos máksi lea lunddolaš olmmoš, almmut maid riegádanáiggi. Almmut lassin olgoriikkalaš dovddaldaga guovtti bustáva riikakoda

Ovdamearkkat riikakodain: Suopma= FI, Ruoŧŧa= SE, Norga = NO, Estteeana= EE, Ruošša RU. Dábálamosit geavahuvvon riikakodat gávdnojit tabeallas dán rávvaga loahpas. Jos riikakoda ii gávdno tabeallas, almmut riikka nama.

Merke almmuhussii maid lassedieđuid addi oktavuohtaolbmo nama ja telefonnummira.

2. Ovddasteaddji

Ovddasteaddjin dárkkuhuvvo bargiid vuolggaheamis addojuvvon lága (447/2016) mielde ovddasteaddji. Jos attát dieđuid olgoriikkalaš bargoaddi ovddasteaddjin, ceahkas čuoggá Dieđuid addá ovddasteaddji (Tiedot antaa edustaja) skovi loahpas.

Almmut ovddasteaddji nama, čujuhusa, suopmelaš persovdnadovddaldaga dahje FS-dovddaldaga dahje, jos suopmelaš dovddaldat ii leat, olgoriikalaš dovddaldaga dieđuid.

3. Boađuoažžu

Almmut boađuoažžu ovda- ja sohkanama sihke suopmelaš persovdnadovddaldaga.

Jos boađuoažžus ii leat suopmelaš persovdnadovddaldat, almmut ovda- ja sohkanama, olgoriikka dovddaldaga, riegádanáiggi (hámis bbmmjjjj) ja sohkabeali. Almmut olgoriikka dovddaldaga tiippa ja dovddaldaga riikakoda.

Almmut boađuoažžu čujuhusdieđuid sihke ruovtturiikkas ja barganriikkas. Almmut olgoriikalaš čujuhusa riikakoda.

4. Bálkká árvvoštallan ja barganáigi Suomas

Almmut árvvoštallama bálkkás, mii mákso boađuoažžui Suomas bargojuvvon barggus oppa vearrojagi áigge. Lasit árvvoštallamii vejolaš lunddolašovdduid (omd. visteovdu, telefonovdu dahje boradanovdu) ja vearuvuloš goluid buhtadusaid (omd. vearuvuloš kilomehterbuhtadusat). Almmut bálkká árvvoštallama euroid mielde.

Almmut Suomas bargama álgo- ja nohkanbeaivvi. Jos dárkilis nohkanbeaivi ii leat dieđus, adde árvvoštallojuvvon nohkanbeaivvi. Nohkanbeaivi sáhttá leat ovdamearkan čuovvovaš kaleandarjagi. Bálkká árvvoštallan ja barggu álggahanbeaivi leat bákkolaš dieđut.

5. Suopmelaš barggu barggaheaddji

Suopmelaš barggu barggaheaddji lea dat, guhte lea láigohan olgoriikalaš láigobargofámu bargui mii lea bargojuvvon Suomas.

Almmut suopmelaš barggu barggaheaddji suopmelaš FS-dovddaldaga dahje persovdnadovddaldaga ja nama. Jos suopmelaš dovddaldat ii leat, almmut olgoriikalaš dovddaldaga dieđuid ja riikakoda.

6. Beaivi ja vuolláičálus

Jos attát almmuhusa olgoriikkalaš bargoaddi ovddasteaddjin, ceahkas čuoggi Dieđuid addá olgoriikka bargoaddi ovddasteaddji (Tiedot antaa ulkomaisen työnantajan edustaja). Ovddasteaddjin dárkkuhuvvo bargiid vuolggaheamis addojuvvon lága (447/2016) mielde ovddasteaddji. Jos ceahkastat dán čuoggá, deavdde maid ovddasteaddji dieđuid čuoggás 2. Ovddasteaddji (Edustaja).

Vuolláičále skovi ovdal go sáddet dan. Merke maid beaivemeari ja telefonnummirat.

Máhcahusčujuhus

Sádde skovi čujuhussii:

Tulorekisteri
PL 1
00055 TULOREKISTERI