50A Dienasboađut ja geahpádusat mat dain dahkkojit, deavdinráva

Dárkkis ovdadevdojuvvon vearroalmmuhusa. Almmut dainna skoviin dušše daid dienasboađuid ja geahpádusaid, mat dahkkojit dienasboađuin ja mat váilot ovdadevdojuvvon vearroalmmuhusas dahje mat leat das boastut.

Sáhtát addit dieđuid jogo OmaVero-bálvalusas dahje dainna skoviin. Skovi ja lassedieđuid oaččot skovvesiiddus. Máhcahančujuhus lea merkejuvvon skovi ovdasiidui.

Skoviin 50A sáhtát almmuhit ja divvut ovdamearkka dihtii čuovvovaš dieđuid:

  • bálkkát, mávssut ja buhtadusat 
  • ealáhagat 
  • ovddut
  • eará dienasboađut
  • bargomárkanservviid lahtto- ja bargguhisvuođakássamávssut 
  • bálkáboađuid boađuskáhppongolut
  • ealihanmávssut
  • bárragaskavuođa nuppástusat 
  • invaliidatehtaproseanta

Almmut olgoriikka dienasboađuid skoviin 16A (Čilgehus olgoriikkaboađuin, dienasboađut).

Geavat dán skovi maiddái dalle, jus dagat njulgengáibádusa vearuhusa nohkama maŋŋá. Deavdde njulgengáibádusa ja lavtte fárrui dán skovi. Sáhtát dahkat njulgengáibádusa maiddái OmaVero-bálvalusas. Dalle dán báberskovi ii dárbbaš.

Jus ozat vearuhusa njulgema dahje divut jo árat addon dieđu, deavdde skovis olles dan oasi, man muhtin dieđu divut. Skovi osiid oainnát vuolde leahki sisdoalus.

Vearroalmmuhusdieđuid divvun lea nuppástuvvan
Skovvi 50A lea ođđa skovvi, mainna sáhtát almmuhit divvumiid ovdadevdojuvvon vearroalmmuhusas leahki dienasboađuide. Skoviin sáhtát almmuhit maiddái geahpádusaid mat dahkkojit dienasboađuin.

Sisdoallu

1 Persovdnadieđut ja vearrojahki 
2 Bálkkát, mávssut ja buhtadusat
3 Biilaovddu árvvu vuolideapmi
4 Ealáhagat 
5 Ovddut
6 Eará dienasboađut
7 Gáibádus boađudássemis dahje ealáhatboađu juohkimis áigodagaide 
8 Geahpádusat mat dahkkojit dienasboađuin 
  8.1 Vearumáksinnávcca hedjonangeahpádus 
  8.2 Bákkolaš ealáhatoadjomávssut earágo bálkkáin
  8.3 Bargomárkanservviid lahtto- ja bargguhisvuođakássamávssut 
  8.4 Bálkáboađuid boađuskáhppongolut
  8.5 Earágo bálkáboađuid boađuskáhppongolut
  8.6 Eará geahpádusat
9 Máksojuvvon ealihanmávssut
10 Riikkaidgaskasaš dilit
11 Bárragaskavuođa nuppástus
12 Invaliidatehtaproseanta

1 Persovdnadieđut ja vearrojahki

Deavdde dasa iežat nama ja persovdnanummira.

Almmut maiddái vearrojagi dahjege dan jagi, mas almmuhat boađuid dahje geahpádusaid.

2 Bálkkát, mávssut ja buhtadusat

Almmut bálkkáid, mávssuid ja buhtadusaid, mat váilot ovdadevdojuvvon vearroalmmuhusas dahje maid hálidat divvut.

Almmut ovdamearkka dihtii

  • ruhtabálkkát
  • lunddolaš ovddut, nugo
    • telefon-, viste-, borramuš- ja biilaovdu 
    • bargogaskavuohtamátkebileahta vearuvuloš oassi
    • biilastálla
    • asttu-áigge visti 
    • mohtorfanas
    • luopmo- dahje bálkkašupmimátki
    • bálkán gehččon bargoveahkaloana reanto-ovdu
    • bálkán dollojuvvon oadjomávssut 
    • ovdu bargogaskavuohtaoptios
  • bargomearrái vuođđuduvvi juogadus, mii vearuhuvvo bálkán
  • bálkálágan mávssut, ovdamearkka dihtii oapmahašdikšu doarjja
  • čoahkkinbálkkášumit 
  • vearuvuloš goluid buhtadusat, ovdamearkka dihtii gielddalaš bearašbeaivedivššáriid goluid buhtadusat
  • bálkán gehččon oassi eaktodáhtolaš ealáhatoadjo mávssuin, man bargoaddi lea váldán
  • bálká barggus, man lea máksán olgoriikkalaš bargoaddi ja mii lea dahkkon Suomas

Jus bálkkát, mávssut dahje buhtadusat váilot ovdadevdojuvvon vearroalmmuhusas dahje hálidat divvut muhtin dieđu, almmut álo buot čuovvovaš dieđuid:

  • máksi F-dovddaldat dahje persovdnanummir 
  • máksi namma 
  • čilgehus das, mii boahtu lea gažaldagas 
  • boađu mearri brutton (bruttoboahtu lea dat boahtu, mas ii leat vel geahpeduvvon ovdavearru dahjege vearru)
  • boađus dahkkon ovdavearrogeassin 
  • bákkolaš ealáhatoadjomávssut, maid bargoaddi bearra 
  • bákkolaš bargguhisvuođamávssut, maid bargoaddi bearra

Jus leat fitnodat- dahje fidnobargi, almmut fitnodatdoibmii laktáseaddji bargobuhtadusaid fitnodat- ja fidnobargi vearroalmmuhusas dahjege skoviin 5.

Jus barggat boađuskáhppondoaimma ja ovdadevdojuvvon vearroalmmuhusas váilot bargobuhtadusat, almmut váilu bargobuhtadusaid skoviin 11 (Boađuskáhppondoaibma).

Vearrohálddahus oažžu dieđu bargobuhtadusain maiddái daid máksiin. Jus boađuskáhppondoibmii laktáseaddji bargobuhtadusa dieđut leat jo fárus ovdadevdojuvvon vearroalmmuhusas muhto dieđuin lea feaillat, divo dieđuid dainna skoviin dahjege skoviin 50A.

Almmut boađuskáhppondoibmii laktáseaddji goluid skoviin 11.

Loga lasi ealáhusdoaimmas, boađuskáhppondoaimmas ja áiggeádjidoaimmas

3 Biilaovddu árvvu vuolideapmi

Jus gáibidat biilaovddu árvvu vuolideami, merke vuolideami vuođuštusa mearkkan. Jus priváhtavuojut leat čoggon vuollel 18 000 km jagis, merke mearkka čuoggái “Gáibidan biilaovddu vuolideami priváhtavuojuid vuođul”. Almmut maiddái priváhtavuojuid kilomehtermeari. Seaillut vuodjinbeaivegirjji alddát.

Jus gáibidat biilaovddu vuolideami eará siva geažil, merke rmearkka čuoggái “Eará sivva biilaovddu árvvu vuolideapmái”. Almmut bargui laktáseaddji vuojuid kilomehtermeriid, jus bargovuojut leat badjel 30 000 kilomehtera jagis ja gáibidat biilaovddu vuolideami dainna vuođuštusan.

4 Ealáhagat

Almmut ovdadevdojuvvon vearroalmmuhusas váilu ealáhagaid dahje divo ealáhatdieđuid.

Almmut čuoggás Suomas ožžojuvvon ealáhagat, ovdamearkka dihtii

  • bargo- ja fitnodatealáhagat 
  • álbmotealáhatlága miel ealáhagat
  • dáhkádusealáhat
  • dáhkádusaide vuođđuduvvi ealáhagat, mat vearuhuvvo dienasboahtun

Almmut ealáhagas buot čuovvovaš dieđuid:

  • máksi F-dovddaldat dahje persovdnanummir
  • máksi namma
  • čilgehus das, mii ealáhat lea gažaldagas 
  • ealáhaga mearri brutton (bruttoboahtu lea dat boahtu, mas ii leat vel geahpeduvvon ovdavearru dahjege vearru)
  • ealáhagas dahkkon ovdavearrogeassin.

5 Ovddut

Almmut ovdadevdojuvvon vearroalmmuhusas váilu ovdduid dahje divo dieđuid.

Almmut ovdamearkka dihtii čuovvovaš ovdduid

  • buohcanbeaiveruđat
  • váhnenbeaiveruđat 
  • bargguhisvuođabeaiveruđat 
  • oahpporuđat
  • rávesolbmuidskuvlendoarjagat

Almmut ovdduin buot čuovvovaš dieđuid:

  • máksi F-dovddaldat dahje persovdnanummir 
  • máksi namma
  • čilgehus das, mii ovdu lea gažaldagas
  • ovddu mearri bruttoboahtun( bruttoboahtu lea dat boahtu, mas ii leat vel geahpeduvvon ovdavearru dahjege vearru)
  • ovdavearrogeassin.

6 Eará dienasboađut

Almmut dán čuoggáš deivvolaš eará dienasboađuid, mat váilot ovdadevdojuvvon vearroalmmuhusas. Eará dienasboađuide rehkenasto ovdamearkka dihtii gávdnanbálká dahje gilvvohallanbálkkašupmi. Almmut eará dienasboađuide laktáseaddji boađuskáhppongoluid čuoggás “Ovdduide ja eará dienasboađuide laktáseaddji golut”.

Jus oaččot vearrojagi áigge máŋggaid boahtoeriid seamma doaimmas, almmut ovdadevdojuvvon vearroalmmuhusas váilu doaimma boađuid ja dasa laktáseaddji geahpádusaid skoviin 11 (Boađuskáhppondoaibma).

Loga lasi boađuskáhppondoaimma vearuhusas.

Almmut veahkkeruđaid ja daidda laktáseaddji goluid skoviin 10 (Veahkkeruđat).

7 Gáibádus boađudássemis dahje ealáhatboađu juohkimis áigodagaide

Merke dasa mearkka, jus gáibidat boađuid juohkima áigodagaide ja boađudássema.

Sáhtát gáibidit boađudássema, jus leat ožžon vearrojagi ovttaháválaš prestašuvnna unnimustá 2 500 euro dienasboađu, mii lea

  • čoggon ovddal- dahje maŋálgihtii guovtti dahje máŋgga jagis
  • unnimustá njealjádas jagi buhtes dienasboađuid oktasaš logus.
    Buhtes dienasboahtu dárkkuha buot dienasboađuid oktasaš logu, mas lea geahpeduvvon boađuskáhppongolut.

Boađudássema ferte gáibidit ovdal go vearrojagi vearuhus nohka.

Lavtte fárrui mávssu máksi duođaštusa ovttaháválaš boađus (ovtta háve mákson boahtu) ja dan máksima vuođuštusain.

Jus leat gáibidan boađudássema jo ovdabearramis ja boađudássen lea gáibádusa vuođul váldon vuhtii nuppástusvearrokoartta rehkenastimis ja ovdavearu doaimmaheamis, don it dárbbaš gáibidit ođđasit boađudássema.

Lassedieđut boađudássemis dienasboađuid vearuhusas

Sáhtát gáibidit ealáhatboađuid juohkima áigodagaide, jus guktot čuovvovaš eavttuin ollašuvvet:

  • Leat jagi áigge ožžon máhccevaš ealáhaga unnimustá 500 euro.
  • Máhccevaš ealáhat čuohzá unnimustá 3 mánu áigodahkii vearrojagi ovddabeale áigái

Ealáhatboađuid juohkima áigodagaide ferte gáibidit ovdal go vearrojagi vearuhus nohka.

Lavtte fárrui buot máhccevaččat mákson ealáhagaide laktáseaddji mearrádusaid.

Jus leat gáibidan ealáhatboađuid juohkima áigodagaide jo ovdabearramis ja juohkin áigodagaide lea gáibádusa vuođul váldon vuhtii nuppástusvearokoartta rehkenastimis ja ovdavearu doaimmaheamis, don it dárbbaš gáibidit ođđasit juohkima áigodagaide.

Lassedieđuid oaččot rávvagis Ealáhatboađuid vearuhus.

8 Geahpádusat mat dahkkojit dienasboađuin

8.1 Vearumáksinnávcca hedjonangeahpádus

Dán čuoggás sáhtát gáibidit vearumáksinnávcca hedjonangeahpádusa. Geahpádus lea árvvoštallamavuloš ja gáibida earenoamáš siva, omd. buohcuvuođa, bargguhuisvuođa dahje ealihangeatnegasvuođa.
Geahpádus sáhttá leat eanemustá 1 400 euro.

Vearumáksinnávcca hedjonangeahpádusa sáhttá mieđihit dušše stuorra buohcuvuođa goluid vuođul, jus

  • du ja du bearašlahttuid oktiirehkenaston buohcuvuođa golut leat vearrojagi unnimustá 700 euro
  • buohcuvuođa golut lea seammas unnimustá 10 % buhtes dienas- ja oaiveopmodatboađuid oktasaš logus. Buhtes dienasboahtu dárkkuha buot boađuid oktasaš logu, mas lea geahpeduvvon boađuskáhppongolut. 

Geahpádusa mieđiheapmái vaikkohit buot bearašlahttuid boađut ja opmodat.

Jus gáibidat geahpádusa buohcuvuođa goluid vuođul, merke mearkka čuoggái “Buohcuvuohta” ja almmut goluid meari čuoggás “Gollu”. Seaillut duhtosiid goluin alddát.

Jus gáibidat geahpádusa eará vuođuštusain, merke mearkka čuoggái “Eará sivva (omd. bargguhisvuohta, ealihangeatnegasvuohta)”. Almmut dunnje šaddan goluid čuoggás “Gollu”.

Merke maiddái goluid oktiirehkenaston meari.

Oahpásnuva dárkileabbot geahpádusa meriide ja vuođuštusaide

8.2 Bákkolaš ealáhatoadjomávssut earágo bálkkáin

YEL – dahje MYEL – oadjomávssut

Almmut ieš mákson bákkolaš ealáhatoadjomávssuid (YEL- ja MYEL – oadjomávssut), jus it leat  almmuhan daid eanandoalu, vuovdedoalu dahje ealáhusdoaimma vearroalmmuhusas (2, 2Y, 2C dahje 5.) Almmut maiddái veahkkeruđaoažžu bákkolaš MYEL- oadjomávssuid, jus dat váilot ovdadevdojuvvon vearroalmmuhusas.

Sáhtát almmuhit bákkolaš YEL- ja MYEL – oadjomávssuid jogo iežat dahje beallelačča vearuhusas. Mávssut geahpeduvvo dan beallelačča dienasboađuin, guhte lea gáibidan geahpádusa (jogo skoviin 50A dahje OmaVero-bálvalusas). Gáibádusa ferte ovdanbuktit ovdal go vearrojagi vearuhus nohka.

Almmut dás maiddái iežat máksinoasi kollektiivvalaš ealáhatoadjomávssuin sihke valáštalli eaktodáhtolaš ealáhat- dahje bárteoadjo mávssuin. 

Olgoriikii mákson ealáhat- ja bargguhisvuođaoadjomávssut

Almmut dás maiddái bálkkáin olgoriikii mákson bákkolaš ealáhat- ja bargguhisvuođaoadjomávssuid.

8.3 Bargomárkanservviid lahtto- ja bargguhisvuođakássamávssut

Jus vearroalmmuhusas váilot bargomárkanservviid ja bargguhisvuođakássa lahttomávssut dahje dieđuin lea feaillat, almmut buot lahttomávssuid oktasaš logu, maid leat máksán jagi áigge čuoggás “Bargomárkanservviid dahje bargguhisvuođakássa lahttomávssut oktiibuot/jahki”.

Merke maiddái dan bargomárkansearvvi dahje bargguhisvuođakássa nama dahje F-dovddaldaga, man dieđut váilo dahje ledje boastut.

8.4 Bálkáboađuid boađuskáhppongolut

Jus dus lea bálkáboađut, oaččot automáhtalaččat 750 euro boađuskáhppongeahpádusa.
Geahpádus ii sáhte goit leat stuorát go du bálkáboađuid mearri.

Almmut boađuskáhppongoluid dušše, jus golut leat eambbo go 750 euro. Merke boađuskáhppongoluid olles mearrin: ále geahpet dain stereotiippalaš 750 euro geahpádusa.

Jus leat jo árat almmuhan boađuskáhppongoluid ja hálidat divvut oasi 8.4 ovttaskas dieđu, deavdde dušše dan vuollečuoggá, man divut. Almmut goluid olles jagis. Don it dárbbaš deavdit ođđasit daid vuollečuoggáid, maid dieđut leat jo riekta.

Skuvlengolut

Merke skuvlengoluid meari, maid leat máksán vearrojagi áigge. Geahpedangelbbolaš skuvlengolut leat ovdamearkka dihtii studerengolut, mat leat šaddan ámmátdáiddu bajásdoallamis.

Bargolatnjageahpádus

Almmut duođalaš bargolanjas šaddan goluid dahje streotiippalaš bargolatnjageahpádusa.
Bargolatnjageahpádusa mearri lea das gitta, man olu geavahat bargolanja váldo- dahje oasseáigásaš bargamii vearrojagi áigge. Loga lasi bargolatnjageahpádusas ja bargolatnjageahpádusa mearis.

Bargobiergasat

Almmut goluid materiálain ja iežat bargobiergasiid geavaheamis, ovdamearkka dihtii telefongolut ja bargo- dahje virgegárvvuid golut.

Lassánan eallámušgolut, mat leat šaddan bárgomátkkiin

Almmut bargomátkkiin šaddan lassánan eallámušgoluid. Dat sáhttet leat ovdamearkka dihtii govttolaš badjelmearálaš boradangolut ja golut go doalat oktavuođa ruoktot.

Eará golut

Almmut eará geahpedangelbbolaš goluid, ovdamearkka dihtii luohttámušolmmošmáksu.

Bálkáboađuid boađuskáhppongolut oktiibuot

Rehkenastte bálkáboađuide laktáseaddji boađuskáhppongoluid, maid leat almmuhan skovis, oktii ja deavdde supmi dasa.

Loga lasi boađuskáhppongoluin mat geahpeduvvo dienasboađuin

8.5 Eará go bálkáboađuid boađuskáhppongolut

Eará bargoboađuid boađuskáhppongolu

Almmut eará bargoboađuide go bálkkáide guoski boađuskáhppongoluid olles jagis. Eará bargoboahtun dárkkuhuvvo buhtadusa, mii ii leat bálká, dahjege ovdamearkka dihtii bargobuhtadus dahje bearaš – ja oapmahašdikšu bálká. Almmut dán čuoggás ovdamearkka dihtii soabadalli gollubuhtadus ja bearaš- ja oapmahašdikšu goluid buhtadusat.

Ovdduide ja eará dienasboađuide laktáseaddji golut

Almmut dás dakkár goluid, mat gusket ovdduide ja eará dienasboađuide olles jagis. Eará dienasboađuide laktáseaddji golut leat ovdamearkka dihtii mátkegolut. Ovdduide laktáseaddji goluid sáhtát geahpedit dušše spiehkastatdáhpáhusain. Dábálaš eallámušgolut eai leat vearuhusas geahpedangelbbolačča.

Eará boađuskáhppongolut – vállje rivttes skovi

Almmut veahkkeruđaide laktáseaddji goluid skoviin 10 (Veahkkeruđat)

Almmut bargolatnjageahpádusa skovin 19 (Bargolatnjageahpádus)Sáhtát geahpidit mákson láiggu bargolatnjageahpádussan. Geahpádus sáhttá leat goit eanemustá 250 euro mánus.

Almmut boađuskáhppondoibmii laktáseaddji goluid skoviin 11 (Baođuskáhppondoaibma).

Almmut oaiveopmodatboađuide laktáseaddji boađuskáhppongoluid skoviin 50B (Oaiveopmodatboađut ja geahpádusat mat dain dahkkojit)

8.6 Eará geahpádusat

Skeaŋkageahpádus

Almmut skeaŋkkas, man leat dahkan universitehtii dahje allaskuvlii. Skeaŋkageahpádusa sáhttá dahkat 850-500 000 euro ruhtaskeaŋkkas, man leat dahkan universitehtii dahje allaskuvlii. Merke dán čuoggái

  • skeaŋkka oažžu namma
  • skeaŋkka mearri euroiguin

Loga lasi skeaŋkageahpádusas

Ruovttoluottabearrangeahpádus

Jus dus lea berrojuvvon ruovttoluotta ovdu, ovdamearkka dihtii oahpporuhta, almmut ruovttoluotta berrojuvvon mearri dás.

9 Máksojuvvon ealihanmávssut

Almmut vearrojagi mákson ealihanmávssuid meari.
Almmut maiddái daid mánáid persovdnanummiriid, main mávssát ealihanmávssuid.

Sáhtát oažžut ealihangeatnegasvuođageahpádusa, jus

  • ealihanveahkki vuođđuduvvá máná ealiheami guoskevaš láhkanjuolggadusa miel soahpamuššii dahje dupmui
  • mánná ii leat ovdal vearrojagi álggu deavdán 17 jagi. 

Geahpádus lea ⅛ máksojuvvon ealihanveahkkis, goit eanemustá 80 euro jagis juohke agivuloš mánás.

Jus leat almmuhan ealihanmávssuid árat ja dat leat merkejuvvon riekta ovdadevdojuvvon vearroalmmuhussii, don it dárbbaš almmuhit daid ođđasit.

Loga lasi ealihangeatnegasvuođageahpádusas

10 Riikkaidgaskasaš dilit

Gáibidan, ahte mu dollojuvvo vearrosoahpamuša miel olgoriikkas ássin
Merke mearkka dán čuoggái, jus leat Suomas almmolaččat vearrogeatnegas, muhto vearrosoahpamuša miel ássanriika lea earágo go Suopma.

Loga lasi rávvagis almmolaš ja ráddjejuvvon vearogeatnegasvuohta (Čuoggás Ohcamuš vearrosoahpamuša miel ássamis).

Gáibidan ráddjejuvvon vearrogeatnegasvuođa
Merke mearkka dán čuoggái, jus ásat olgoriikkas ja geahčat, ahte don leat Suomas ráddjejuvvon vearrogeatnegas.

Loga lasi rávvagis almmolaš ja ráddjejuvvon vearogeatnegasvuohta (Čuoggás Ohcamuš ráddjejuvvon vearrogeatnegasvuođas).

Gáibidan vearuhusas luoitima dahje geahpádusa vearrosoahpamuša studeanta-, oahpaheaddji- dahje dutki artikla vuođul
Merke mearkka dán čuoggái, jus leat olgoriikkas Supmii boahtán studeanta, oahpaheaddji dahje dutki ja gáibidat vearrosoahpamuša vuođul vearuhusas luoitima dahje geahpádusa iežat vearuhussii.

Loga lasi olgoriikkas boahti studeanttaid vearuhusas

Loga lasi olgoriikkas Supmii boahti dutkiid ja oahpaheaddjiid vearuhusas

Mus lea ássanstáhta A1- duođaštus dahje vástideaddji duođaštus
Merke mearkka dán čuoggái, jus barggat Suomas ja jus dus lea duođaštus das, ahte gulat iežat ássanstáhta sosiáladorvvu biirei (omd. A1- dahje E101-duođaštus).

Gáldovearrogeahpádus
Merke dán čuoggái barganáigodagaid, jus leat ráddjejuvvon vearrogeatnegas láigobargi ja gáldovearrogeahpádus váilu ovdadevdojuvvon vearroalmmuhusas dahje geahpádusa mearri lea boastut. Merke skovvái maiddái barganbeaivviid meari oktiibuot. Jus leat gáibidan progressiivvalaš vearuhusa gáldovearuhusa sadjái, dán čuoggá ii dárbbaš deavdit.

Loga lasi olgoriikkalaš láigobargi vearuhusas

11 Bárragaskavuođa nuppástus

Jus don ja du beallelaš leahki fárren vearrojagi áigge bissovaččat sierra danin, ahte eahpi šat eale ovttas, merke čuoggái dan beaivvi, go leahpi fárren sierra.

12 Invaliidatehtaproseanta

Jus hálidat almmuhit invaliidatehtaproseantta ođđa diehtun dahje invaliidatehtaproseanta lea nuppástuvvan, bija mearkka dán čuoggái. Lavtte fárrui doaktára duođaštusa, mas oidno ođđa hehttedusdássi. Sáhtát oažžut invaliidageahpádusa, jus dus lea buohcuvuođas, vigis dahje váttus šaddan bissovaš, 30-100 proseantta hehttehusdássi. Jus dutnje lea mieđihuvvon bargonávccahisvuođaealáhat, hehttehusdássin gehččo almma sierra čilgehusa 100 proseantta. Jus bargonávccahisvuođaealáhat lea mieđihuvvon oasseealáhagan, hehttehusdássi lea 50 %.

Loga lasi invaliidageahpádusa eavttuin

Beive ja vuolláičále skovi. Almmut maiddái telefovdnanummira, mas du fáhte beaivit.