Verohallinnon nimissä on lähetetty huijausviestejä. Lue lisää huijauksista.

Čujuhusnuppástus

Juos du fásta čujuhus nuppástuvvá, reahkká ahte dagat fárrenalmmuhusa Digi- ja álbmotdiehtovirgedoaimmahahkii. Juos hálidat iežat vearropoastta gaskaboddosaččat nuppi čujuhussii dahje fárret Suomas olgoriikii dahje olgoriikkas Supmii, almmut du ođđa čujuhusa Vearrohálddahussii.

Fásta čujuhusnuppástus: almmolaš fárrenalmmuhus reahkká

Priváhtaolmmoš ii dárbbaš sierra almmuhit iežas fásta čujuhusnuppástusa Vearrohálddahussii. Digi- ja álbmotdiehtovirgedoaimmahahkii dahkkon fárrenalmmuhus reahkká.

Daga fárrenalmmuhusa (posti.fi/muuttoilmoitus)

Gaskaboddosaš čujuhusnuppástus dahje čujuhusnuppástus olgoriikkas: almmut nuppástusa Vearrohálddahussii

Almmut čujuhusnuppástusa Vearrohálddahussii, juos

  • hálidat iežat vearropoastta gaskaboddosaččat eará báikái go du fásta čujuhussii
  • fárret Suomas olgoriikii dahje olgoriikkas Supmii
  • du fásta čujuhus lea olgoriikkas

Printe skovi poastačujuhusa almmuheami várás (skovvi 3817, suomagillii). Skovi sadjái sáhtát dahkat almmuhusa maid friijahápmásaš reivviin. Reivves galgá boahtit ovdan namma, persovdnanummir, ođđa čujuhus ja beaivemearri, man rájes nuppástus boahtá fápmui.

Gaskaboddosaš čujuhus galgá almmuhuvvot Vearrohálddahussii persovnnalaččat dahje čálálaččat. Čujuhusa ii sáhte almmuhit Vearrohálddahussii telfona bokte iige neahtas. Vearrohálddahusa čujuhusdieđuid gávnnat oktavuohtadieđuin.

Sáhtát fápmudit maiddái áššeolbmo dahkat čujuhusnuppástusa du bealis.

Muitte almmuhit gaskaboddosaš čujuhusa fápmoáiggi nohkama, go máhcat iežat fásta čujuhussii.

Manin poasta ii joavdda rivttes báikái?

Juos leat dahkan čujuhusnuppástusa, muhto poasta ii goittotge joavdda rivttes čujuhussii, váldde oktavuođa vearrodoaimmahahkii ja bivdde dárkkistit čujuhusdieđuid.

Vearrokoarttaid ja vearroalmmuhusaid sáddemis geavahuvvo dat čujuhus, mii lea Vearrohálddahusa áššehasregistaris moadde mánotbaji ovdal sáddema. Lea nappo vejolaš, ahte du vearrokoarta dahje vearroalmmuhus sáddejuvvo boares čujuhussii.

Jápminbeasi čujuhusnuppástus: almmut nuppástusa Vearrohálddahussii

Jápminbeasi čujuhusdieđuid nuppástuhttin galgá dahkkot čálálaččat vearrodoaimmahahkii. Buohkat beasi osolaččat galget dohkkehit nuppástusa. Almmut jápminbeasi oktavuohtaolbmo čujuhusa (suomagillii).

Dohkkeheapmi sáhttá addot nu, ahte

  • buohkat jápminbeasi osolaččat vuolláičállet almmuhusa dahje
  • nuppástusa almmuheaddjis lea buohkaid osolaččaid vuolláičállin váldegirji. Go jápminbeasi osolaččat leat oktii fápmudan áššeolbmo dikšut buot jápminbeasi áššiid, sáhttá áššedikšu fápmudusa vuođul almmuhit ođđa čujuhusa.
  • duopmostuolu mearridan beassečilgejeaddji dahká almmuhusa. Beassečilgejeaddji galgá čájehit dikki addin mearrádusa beassečilgemis, nu ahte fápmudus sáhttá nannejuvvot.
  • testameantta čađaheaddji dahká almmuhusa. Son sáhttá čájehit iežas fápmudusa dainna, ahte testameanta lea ožžon lágafámu dahje testameantta moaitináigi lea mannan gitta.

Áššedikšu jápminbeassái

Vearrohálddahus ávžžuha, ahte jápminbeasi osolaččat fápmudit áššedikšu dikšut buot jápminbeasi vearroáššiid. Áššedikšu sáhttá almmuhit Vearrohálddahussii maiddái jápminbeasi báŋkooktavuohtadieđu vearromáhcahusa máksima várás.

Fápmut áššedikšu: Váldegirji jápminbeasi vearroáššiid várás (skovvi 3630, suomagillii)

Váldegirjeskoviin sáhttá fápmudit áššedikšu juogo ovttaskas doaibmabiju várás dahje dikšut buot jápminbeasi vearroáššiid.

Almmut čujuhusa, juos ásat dikšunlágádusas

Dikšun- dahje fuolahanlágádusas dahje fáŋgalis ássamis ii boađe diehtu Vearrohálddahussii. Čujuhusnuppástusa galgá almmuhit vearrodoaimmahahkii. Čujuhussan sáhttá merkejuvvot maiddái áššedikšu dahje eará fápmuduvvon olbmo čujuhus.

Dorvogielddusáššehas

Vearrohálddahus oažžu álo dieđu álbmotdiehtovuogádaga dorvogildosis ja priváhtaolbmo čujuhusas. Dorvogielddus merkejuvvo Vearrohálddahusa diehtovuogádahkii ja váldo vuhtii Vearrohálddahusa doaimmain.

Dát ráva eará gielaiguin

Ráva suomagillii: Osoitteenmuutos

Ráva ruoŧagillii: Adressändring

Sivu on viimeksi päivitetty 15.1.2025