Suomi.fi-saaǥǥ da liâđǥlaž piiđpååʹšt takaiääʹššlaid

Jõs leäk tiuddâkksaž jiâ-ga tuʹst leäkku Suomi.fi-saaǥǥ âânnmõõžžâst, vuäǯǯak kääzzkõõzz ââʹnnemnalla seämmaääiʹj, ǥu tobddõõđak Suomi.fi-tobddõõǥǥin ouddmiârkkân OmaVero leʹbe koon-ne nuuʹbb veʹrǧǧneeʹǩǩ äʹššõõttâmkääzzkõʹsse (ouddm. OmaKanta leʹbe OmaKela).  

• Tobddõõttâm õhttvuõđâst tuʹnne räʹjje automaattlânji liâđǥlaž pååʹštčuuʹǩǩ Suomi.fi-saaǥǥid.  
• Suomi.fi-saaǥǥ  liâ Digi- da narodteâttkonttâr kääzzkõõzz, koozz vuäǯǯak jeeʹres veʹrǧǧneeʹǩǩ vuõltteem ǩeeʹrjid, tuʹmmstõõǥǥid da laaskid. Seämma ääʹšš jiâ vuõlttâd põʹmmaipååʹšten.
• Vuäitak lookkâd Suomi.fi-saaǥǥid puättam ǩeeʹrjid Suomi.fi-mobiilsuåvldõõzzin leʹbe neʹttseiddõõzzâst suomi.fi/viestit. Leäʹmnnad Suomi.fi -suåvldõõzz teʹlfooʹne.  
• Suomi.fi-saaǥǥ vuõlttâd tuʹnne iʹlmmtõõzz ođđ ǩeeʹrjest, jõs leäk lââʹzztam neʹttpååʹštaddrõõzz kääzzkõʹsse leʹbe priimmâm iʹlmmtõõzzid Suomi.fi-suåvldõõzzâst.

Piiđvaaldâšm vuõltteem ǩeeʹrj, tuʹmmstõõǥǥ da jeeʹres äʹššǩeeʹrj liâ pâi OmaVero kääzzkõõzzâst jiâ-ga tõid vuõlttâd Suomi.fi -saaǥǥid. Vuäǯǯak Suomi.fi-saaǥǥin pâi teâđ, što leäk vuäǯǯam OmaVero kääzzkõʹsse ođđ piiđpååʹšt.  

Vuâmmaš: Siirdčõõđak liâđǥlaž veʹrǧǧneǩpååʹšt vuâsttavalddjen automaattlânji, ǥu tobddõõđak koozz täättas õõlmâsvaaldâšm äʹššõõttâmkääzzkõʹsse Suomi.fi-tobddõõǥǥin. Šuurmõs vueʹss veʹrǧǧniiʹǩǩi vuõltteem ǩeeʹrjin puäʹtte tõʹst ooudårra pâi liâđǥlõʹžžen Suomi.fi-saaǥǥid.

Tâʹl ǥu ǩeʹrjjõõđak OmaVero kääzzkõʹsse 1.6.2026 mâŋŋa da vaʹlljääk liiŋk Hoida omia veroasioita (säämas: Hååid jiijjad piiđaaʹššid), tuu seʹrdde automaattlânji liâđǥlaž piiđpååʹšt vuâsttavaʹlddjen. Vuäǯǯak Piiđvaaldâšm vuõltteem ǩeeʹrjid da tuʹmmstõõǥǥid pâi OmaVero kääzzkõʹsse, jiâ-ga tõid vuõlttâd teänab põʹmmaipååʹšten. Håʹt-i leʹččiǩ jaukkääm Suomi.fi-saaǥǥid âânnmõõžžâst, leša hååidak jiijjad piiđaaʹššid OmaVero kääzzkõõzzâst, vuäǯǯak piiđpååʹšt pâi OmaVero kääzzkõʹsse.   

Iʹlmmet OmaVero kääzzkõõzzâst neʹttpååʹštaddrõõzz leʹbe teʹlfon-nââmar, tâʹl vuäǯǯak Piiđvaaldšummšest iʹlmmtõõzz jiijjad vaʹlljeemnalla, ǥu leäk vuäǯǯam OmaVero kääzzkõʹsse ođđ ǩeeʹrj, tuʹmmstõõǥǥ leʹbe mõõn-ne jeeʹres äʹššǩeeʹrj.

Nääiʹt ooudak OmaVero kääzzkõõzzâst õhttvuõtt-teâđaid iʹlmmtõõzzi väʹrdd:

1. Ǩeʹrjjõõđ OmaVero kääzzkõʹsse da vaʹlljad liiŋk Hoida omia veroasioita (säämas: Hååid jiijjad piiđaaʹššid). 
2. Vuäinak Tiõrvpueʹttem-seeid. Čuåkkâl Ilmoita yhteystiedot veropostia varten (säämas: Iʹlmmet õhttvuõtt-teâđ piiđpååʹšt väʹrdd) -liiŋk, de piâzzak iʹlmmted õhttvuõtt-teâđääd.
3. Iʹlmmet neʹttpååʹštaddrõs leʹbe teʹlfon-nââmar. Vuäitak iʹlmmted še kuhttu. Piiđvaaldâšm vuõlttâd tuʹnne tän õhttvuõtt-tiõttu saaǥǥ, ǥu tuʹnne lij puättam OmaVero kääzzkõʹsse ođđ tuʹmmstõk leʹbe ǩeʹrjj. Vuäitak haaʹleʹmmen vaʹlljeed, što jiõk iʹlmmet õhttvuõtt-teâđääd. Tâʹl jiõk vuäǯǯ OmaVero kääzzkõõzzâst iʹlmmtõõzz ođđ piiđpååʹštest.
4. Jõs iʹlmmtak teʹlfoon-nââmar, tuʹst kâʹčče, haaʹlääk-a što teʹlfoon-nââmar peiʹvvee jiijjad teâđaid. Vaʹlljed Kyllä leʹbe Ei (säämas: Kâʹl leʹbe Ij). Jõs vaʹlljääk Kyllä (Kâʹl), tuʹnne vâjja taarbšeʹmmen leeʹd õhttvuõđâst teʹlfoonin, jõs piiđtem väʹrdd taarbše lââʹssteâđaid. Jiijjad teâđaid ruõkkum teʹlfon-nââmar âʹnne vueʹlnn åårrai aaʹššid:
   • Tõt kuâsttai valmmša piiđiʹlmmtõõzzin, ooccmõõžžin da vuõiǥeemõõlǥtõõzzin, koid leäk raajjâm OmaVero kääzzkõõzzâst. 
   • Piiđvaaldâšm veʹrǧǧšeeʹǩǩ vueiʹtte taarbšeʹmmen soiʹttjed tõõzz.
   • Piiđvaaldâšm vuäitt vuõltteed tõõzz teʹksttsaaǥǥid.  
5. Jiõk vuäǯǯ teänab põʹmmaiǩeeʹrjid Piiđvaaldšmest. Vuäǯǯak iʹlmmtum õhttvuõtt-tiõttu saaǥǥ, ǥu OmaVero kääzzkõõzzâst lij tuʹnne ođđ piiđpååʹšt.
6. Haaʹleʹmmen vuäitak iʹlmmted OmaVero kääzzkõõzzâst tääuʹjab neʹttpååʹštaddrõõzz. Ouddmiârkkân, jõs haaʹlääk, što ǩii-ne õõldâsooumaž vuäǯǯ iʹlmmtõõzz tuʹnne puättam piiđpååʹštest, vuäitak lââʹzzted suu õhttvuõtt-teâđaid Asiakastiedot (säämas: Ääʹššlažteâđ) -kõskkseidd pääiʹǩest Veroasioita hoitavien henkilöiden sähköpostiosoitteet (säämas: Piiđaaʹššid håiddai oummi neʹttpååʹštaddrõõzz).

Muuttâs puäʹtte viõʹǩǩe tâʹllesǩâni.   

Vuâmmaš! Jõs tuʹst liâ Suomi.fi-saaǥǥ âânnmõõžžâst, vuäǯǯak ođđ ǩeeʹrjest pâi Suomi.fi-saaǥǥ. Jõs leäk iʹlmmtam OmaVero kääzzkõõzzâst neʹttpååʹštaddrõõzz da /leʹbe teʹlfon-nââmar, vuäǯǯak seämma ǩeeʹrjest še neʹttpååʹšt da/leʹbe teʹksttsaaǥǥ Piiđvaaldšmest. Vuäitak vuäǯǯad seämma ǩeeʹrjest tääuʹjab iʹlmmtõõzz.

Jõs liâđǥlaž äʹššõõttmõš lij tuu miõlâst vaiggâd, vuäitak uʹvdded väʹlddõõzz nuuʹbb ooumže håiddad piiđaaʹššid da ââʹnned huõl piiđpååʹštest. Väʹlddõõzz ouddmõš âlgg raajjâd Suomi.fi-kääzzkõõzzâst. 

Vuäʹppõs: Suomi.fi -valtuus veroasioihin – näin annat ja pyydät valtuuden

Jeäʹl uuʹd baŋkktobdldõõǥǥid nuuʹbb ooumže ǥu uuʹd väʹlddõõzz. Väʹlddõõzz ouddmõš lij teâttstaanʼjab nääʹll. Tâʹl ǥu õõldâsoummust lij Veroasioiden hoito -valtuus (säämas: Piiđaaʹšši håidd -väʹlddõs), son ǩeʹrjjââtt OmaVero kääzzkõʹsse jiijjâs tobdldõõǥǥid. Son vuäitt håiddad piiđaaʹššid OmaVero kääzzkõõzzâst da son peäss še lookkâd ǩeeʹrjid da tuʹmmstõõǥǥid peäʹlstad.

Piiđaaʹšši håidd -väʹlddõs ouddmõš õõldâsooumže ij vääʹld jijstad ni-mâiʹd vuõiggâdvuõđid meädda ij-ga vaikkat tõõzz, vuäǯǯak-a piiđpååʹšt põʹmmaipååʹšten avi liâđǥlõʹžžen. Väʹlddjummuš oudd nuuʹbb ooumže vueiʹtlvažvuõđ håiddad piiđaaʹššid peäʹlstad taarb mieʹldd.

Lââʹssen vuäitak uʹvdded nuuʹbb ooumže še nåkam Suomi.fi- väʹlddõõzz, koon vieʹǩǩin väʹlddõõzz vuäǯǯai vuäitt ââʹnned peäʹlstad Suomi.fi-saaǥǥid. Vuäʹppõs Suomi.fi:st: Toisen henkilön puolesta asiointi ja erityistilanteet.

Jeäʹl ââʹn õõldâsoummu baŋkktobdldõõǥǥid ǥu raauk suʹst väʹlddõõzz piiđaaʹšši håiddmõʹšše. Välddõõzz ouddmõš lij teâttstaanʼjab nääʹll. Tâʹl ǥu õõldâsooumaž oudd tuʹnne Suomi.fi:st Veroasioiden hoito -valtuuden (säämas: Piiđaaʹšši håidd -väʹlddõõzz), ǩeʹrjjõõđak OmaVero kääzzkõʹsse jiijjad tobdldõõǥǥin. Vuäitak håiddad õõldâsoummu piiđaaʹššid OmaVero kääzzkõõzzâst da piâzzak še lookkâd ǩeeʹrjid da tuʹmmstõõǥǥid suu peäʹlest.

Tâʹl ǥu äʹššõõđak nuuʹbb oummu peäʹlest OmaVero kääzzkõõzzâst Piiđaaʹšši håidd -väʹlddõõzzin, vuäitak iʹlmmted jiijjad neʹttpååʹštaddrõõzz Asiakastiedot (säämas: Ääʹššlažteâđ) -kõskkseidd pääiʹǩest Veroasioita hoitavien henkilöiden sähköpostiosoitteet. (säämas: Piiđaaʹššid håiddai oummu neʹttpååʹštaddrõõzz). Tõʹst ooudårra vuäǯǯak teâđ jiijjad neʹttpååʹštaddrõʹsse, ǥu väʹlddõõzz uvddja lij OmaVero kääzzkõõzzâst ođđ piiđpååʹšt.

Håʹt-i tiʹllʼjeʹčiǩ iʹlmmtõõzzid jiijjad neʹttpååʹštaddrõʹsse, tõt ij vaikkat tõõzz, mõõn-nalla väʹlddõõzz uvddi jiõčč vuäǯǯ Piiđvaaldâšm vuõltteem ǩeeʹrjid. Personpuõttlaž piiđpååʹšt tååimtemnääʹll mottai põʹmmaiǩeeʹrjin liâđǥlõʹžžen pâi tâʹl, ǥu ooumaž jiõčč ǩeʹrjjââtt OmaVero kääzzkõʹsse personpuõttlaž tobdstemneävvain, ouddmiârkkân mobiilravvõõzzin da håidd jiijjâs piiđaaʹššeez.

Vuâmmaš, što jõs tuʹst jiâ leäkku veâl Suomi.fi-saaǥǥ âânnmõõžžâst, vuäǯǯak tõid ââʹnnemnalla automaattlânji OmaVero kääzzkõʹsse tobddõõttâm õhttvuõđâst. Tuʹnne räʹjje liâđǥlaž pååʹštčuuʹǩǩ Suomi.fi-saaǥǥid da vuäǯǯak juätkast jiijjad kuõskki veʹrǧǧneǩpååʹšt tõõzz.    

Tâʹl ǥu tuʹst lij Piiđaaʹšši håidd -väʹlddõs, vuäitak taarbšeʹmmen raajjâd OmaVero kääzzkõõzzâst väʹlddõõzz uvddi peäʹlest ilmoituksen paperisen veropostin valitsemisesta (säämas: iʹlmmtõõzz põʹmmaipååʹšt vaʹlljummšest). Tâʹl piiđpååʹšt puätt väʹlddõõzz uvddja pâi põʹmmaipååʹšten.

Nääiʹt tuejjääk iʹlmmtõõzz põʹmmai piiđpååʹšt vaʹlljummšest  

1. Ǩeʹrjjõõđ OmaVero kääzzkõʹsse da vaʹlljed tõn oummu, ǩeän peäʹlest haaʹlääk raajjâd iʹlmmtõõzz.
2. Asiakastiedot (säämas: Ääʹššlažteâđ) -kõskkseeidast vaʹlljed Ilmoitus paperisen veropostin valitsemisesta (säämas: Iʹlmmtõs põʹmmai piiđpååʹšt vaʹlljummšest).
3. Kõõččmõʹšše Valitsetko paperisen veropostin? (säämas: Vaʹlljääk-a põʹmmai piiđpååʹšt? Vaʹlljed: Vahvistan, että valitsen paperisen veropostin (säämas: Raʹvvjam, što vaʹlljääm põʹmmai piiđpååʹšt).
4. Väʹlddõõzz uvddi vuäǯǯ piiđpååʹšt põʹmmaipååʹšten uuʹccmõsân 60 peeiʹv ääiʹj. Jõs väʹlddõõzz uvddi jiõčč ǩeʹrjjââtt OmaVero kääzzkõʹsse 60 peeiʹv mâŋŋa, suu seʹrdde automaattlânji liâđǥlaž piiđpååʹšt vuâsttavaʹlddjen. Jõs son ij jiõčč ǩeʹrjjõõđ OmaVero kääzzkõʹsse, põʹmmaipååʹšt pääcc viõʹǩǩe.

Jõs väʹlddõõzz uvddi jäämm, pååʹšt tååimtemnääʹll mottai põʹmmaipååʹšten. Seämma ääiʹj jaukkee puk tõid neʹttpååʹštaddrõõzzid, kook liâ lââʹzztum Piiđaaʹššid håiddji neʹttpååʹštaddrõs -liʹstte. Vaʹldduum ij teänab vuäǯǯ  neʹttpååʹšt-iʹlmmtõõzzid jäämmam oummu piiđaaʹššin.

Jõs leäk vuâlla 18-ekksaž, vuäǯǯak piiđpååʹšt põʹmmaipååʹšten. Jõs haaʹlääk Piiđvaaldâšm ǩeeʹrjid da tuʹmmstõõǥǥid liâđǥlõʹžžen vuäitak väʹldded ââʹnnemnalla Suomi.fi-saaǥǥid, jõs tuʹst lij lääʹddjânnam persontobdldõk da mobiilravvõs leʹbe baŋkktobdldõõǥǥ.

Tâʹl ǥu tuʹst liâ âânnmõõžžâst Suomi.fi-saaǥǥ, vuäǯǯak veʹrǧǧneeʹǩǩ vuõltteem pååʹšt liâđǥlõʹžžen. Vueʹllâkksen jiõk vueiʹt iʹlmmted õhttvuõtt-teâđaid OmaVero kääzzkõʹsse liâđǥlaž piiđpååʹšt väʹrdd.

Vueʹllâkksaž päärna peâmmjen vuäitak iʹlmmted neʹttpååʹštaddrõõzz OmaVero kääzzkõõzzâst, jõs haaʹlääk vuäǯǯad Piiđvaaldšmest iʹlmmtõõzzid päärna piiđpååʹštest. Lââʹzzet neʹttpååʹštaddrõs Asiakastiedot (säämas: Ääʹššlateâđ) -kõskkseidd pääiʹǩest Veroasioita hoitavien henkilöiden sähköpostiosoitteet (säämas: Piiđaaʹššid håiddai oummu neʹttpååʹštaddrõõzz).

Vueʹllâkksaž vuäǯǯ kuuitâǥ Piiđvaaldâšm ǩeeʹrjid põʹmmaipååʹšten, jõs suʹst jiâ leäkku Suomi.fi-saaǥǥ  ââʹnnemnalla.

Peâmmjen vuäitak še väʹldded Suomi.fi-saaǥǥid ââʹnnemnalla vueʹllâkksaž päärna peäʹlest. Vuäʹppõs Suomi.fi:st: Toisen henkilön puolesta asiointi ja erityistilanteet.  

Vuâmmaš, što jõs tuʹst jijstad jiâ leäkku Suomi.fi-saaǥǥ  âânnmõõžžâst, vuäǯǯak tõid ââʹnnemnalla automaattlânji OmaVero kääzzkõʹsse tobddõõttâm õhttvuõđâst. Tuʹnne räʹjje liâđǥlaž pååʹštčuuʹǩǩ Suomi.fi-saaǥǥid da vuäǯǯak juätkast jiijjad kuõskki veʹrǧǧneǩpååʹšt tõõzz.

Privatt ouddõsǩiõčči da ouddõsvalvvâmvaldduum vuäǯǯa piiđpååʹšt pâi põʹmmaiǩeʹrjjen. Tän roolâst vuäitak kuuitâǥ iʹlmmted neʹttpååʹštaddrõõzz OmaVero kääzzkõõzzâst, što vuäǯǯak iʹlmmtõõzz, ǥu ouddõsvalvvmõõžžâst åårrai ooumaž lij vuäggam OmaVero kääzzkõʹsse ǩeeʹrj, tuʹmmstõõǥǥ leʹbe mõõn-ne jeeʹres pååʹšt. Neʹttpååʹštaddrõõzz lââʹzztummuš âlgg raajjâd Asiakastiedot (säämas: Ääʹššlažteâđ) -kõskkseidd pääiʹǩest Veroasioita hoitavien henkilöiden sähköpostiosoitteet (säämas: Piiđaaʹššid håiddai oummi neʹttpååʹštaddrõõzz).

Jõs ouddõsvalvvmõõžžâst åårrai oummust liâ Suomi.fi-saaǥǥ  âânnmõõžžâst, son vuäǯǯ Suomi.fi-saaǥǥin teâđ ǩeeʹrjest, kååʹtt lij vuõlttuum ouddõsǩiõččja.

Privatt ouddõsǩiõččjest lij tiõttum vueʹjjin roolâs vuâđast vuõiggâdvuõtt äʹššõõttâd Suomi.fi-saaǥǥin ouddõsvalvvmõõžžâst åårrai oummu peäʹlest. Vuäʹppõs Suomi.fi-st: Edunvalvonta.

Jõs tuʹst lij âânnmõõžžâst Suomi.fi-saaǥǥ da/leʹbe liâđǥlaž piiđpååʹšt, leša haaʹlääk seʹrdded mååusat põʹmmaiǩeeʹrjid Piiđvaaldšmest da jeeʹres veʹrǧǧniiʹǩǩin, tâʹl feʹrttjak vueʹjj mieʹldd raajjâd õõut leʹbe kueʹhtt iʹlmmtõõzz: 

Jõs ââʹnnemnalla liâ Suomi.fi-saaǥǥ  da piiđpååʹšt pâi OmaVero kääzzkõʹsse:

1. Raaj OmaVero kääzzkõõzzâst Ilmoitus paperisen veropostin valitsemisesta (säämas: Iʹlmmtõs põʹmmaipååʹšt vaʹlljummšest). Iʹlmmtõs âlgg raajjâd Asiakastiedot (säämas: Ääʹššlažteâđ) -kõskkseeidast.
2. Iʹlmmet Suomi.fi-saaǥǥi šiõttõõzzin, što loopptak Suomi.fi-saaǥǥi âânnmõõžž. Vuäʹppõs Suomi.fi:st: Viestien käytön lopettaminen.

OmaVero kääzzkõõzzâst põʹmmaipååʹštvaʹlljõs lij viõǥǥâst 60 peiʹvved. Tõn ääiʹj vuäitak ââʹnned OmaVero da vuäǯǯak piiđpååʹšt põʹmmaipååʹšten. Mâŋŋa ǥu 60 peiʹvved lij mõõnnâm, vuäǯǯak piiđpååʹšt eʹpet pâi OmaVero kääzzkõʹsse, jõs ǩeʹrjjõõđak kääzzkõʹsse jiijjad tobdldõõǥǥin.

Suomi.fi:st põʹmmaipååʹštvaʹlljõs lij viõǥǥâst 365 peiʹvved vuârstes. Tõn ääiʹj vuäitak ââʹnned liâđǥlaž veʹrǧǧneǩ-kääzzkõõzzid da vuäǯǯak pååʹšt kuuitâǥ põʹmmaipååʹšten. Mâŋŋa ǥu 365 peiʹvved lij mõõnnâm, vuäǯǯak veʹrǧǧneǩpååʹšt eʹpet liâđǥlõʹžžen, jõs tobddõõđak koon-ne veʹrǧǧneeʹǩǩ kääzzkõʹsse jiijjad tobdldõõǥǥin.

Jõs ââʹnnemnalla liâ pâi Suomi.fi-saaǥǥ:  

Iʹlmmet Suomi.fi-saaǥǥi šiõttõõzzin, što loopptak Suomi.fi-saaǥǥi âânnmõõžž. Vuäʹppõs Suomi.fi:st: Viestien käytön lopettaminen. Vuäǯǯak tõʹst ooudårra ǩeeʹrjid põʹmmaipååʹšten Piiđvaaldâšm lââʹssen še jeeʹres veʹrǧǧniiʹǩǩin.         

Põʹmmaipååʹštvaʹlljõs lij viõǥǥâst 365 peiʹvved vuârstes. Tõn ääiʹj vuäitak ââʹnned liâđǥlaž veʹrǧǧneǩ-kääzzkõõzzid da vuäǯǯak pååʹšt kuuitâǥ põʹmmaipååʹšten. Mâŋŋa ǥu 365 peiʹvved lij mõõnnâm, vuäǯǯak veʹrǧǧneǩpååʹšt eʹpet liâđǥlõʹžžen, jõs tobddõõđak koon-ne kääzzkõʹsse jiijjad tobdldõõǥǥin.

Jõs tuʹst lij vââʹǩǩ, mõõn diõtt jiõk vueiʹt ni võõps ââʹnned OmaVero, vuäitak iʹlmmted tõʹst Piiđvaaldâšm ääʹššlažkääzzkõõzzâst.

Jõs moottak meädda Lääʹddjânnmest, vuäǯǯak ooudâs liâđǥlaž piiđpååʹšt. Jõs jiõk vueiʹt mâŋŋa muʹttem teänab ǩeʹrjjõõttâd OmaVero kääzzkõʹsse, raaj ooudbeäʹlnn mottmõõžž iʹlmmtõs põʹmmaipååʹšt vuâsttavälddmõõžžâst OmaVero kääzzkõõzzâst de iʹlmmtõõzz Suomi.fi-saaǥǥi âânnmõõžž loopptummšest. Nääiʹt ainsmââttak, što vuäǯǯak piiđpååʹšt da jeeʹres veʹrǧǧneǩpååʹšt juätkast põʹmmaiǩeʹrjjen.

Tuʹst lij vaʹstteemvuõtt ââʹnned OmaVero kääzzkõõzzâst ääiʹj tääʹzzest neʹttpååʹštaddrõõzz leʹbe teʹlfon-nââmar, koozz Piiđvaaldâšm vuõlttâd iʹlmmtõõzzid ođđ piiđpååʹštest. Ruõkk OmaVero kääzzkõʹsse pâi nåkkmid õhttvuõtt-teâđaid, koozz vueiʹtte vuõltteed iʹlmmtõõzzid piiđpååʹštest.

Nääiʹt iʹlmmtak ođđ neʹttpååʹštaddrõõzz da/leʹbe teʹlfon-nââmar OmaVero kääzzkõõzzâst

1. Ǩeʹrjjõõđ OmaVero kääzzkõʹsse da vaʹlljed Hoida omia veroasioita (säämas: Hååidam jiijjan piiđaaʹššid).
2. Vaʹlljed kõskkseidd Asiakastiedot (säämas Ääʹššlažteâđ) –  Yhteystiedot veropostia varten (säämas: Õhttvuõtt-teâđ piiđpååʹšt väʹrdd).
3. Vaʹlljed teäddõõǥǥ Päivitä yhteystietoja (säämas Peiʹvved õhttvuõtt-teâđaid).  
4. Čuäkkat neʹttpååʹštaddrõõzz da /leʹbe teʹlfon-nââmar 

Vuâmmaš, što Suomi.fi neʹttpååʹštaddrõõzz ij vueiʹt muʹtted OmaVero pääiʹǩ. Jõs haaʹlääk iʹlmmted Suomi.fi:je ođđ neʹttpååʹštaddrõõzz, raaj tõn vuõiʹǧǧest Suomi.fi-saaǥǥi šiõttõõzzin.  

Jõs haaʹlääk muʹtted neʹttpååʹštaddrõõzz OmaVero kääzzkõõzzâst ǩeän-ne nuuʹbb peäʹlest, tååim nääiʹt

1. Tuʹst âʹlǧǧe leeʹd Veroasioiden hoito -valtuus (säämas: Piiđaaʹšši håidd -väʹlddõs).
2. Ǩeʹrjjõõđ OmaVero kääzzkõʹsse da vaʹlljed tõn oummu, ǩeän peäʹlest haaʹlääk iʹlmmtõõzz raajjâd.
3. Vaʹlljed kõskkseidd Asiakastiedot (säämas Ääʹššlažteâđ) – Yhteystiedot veropostia varten (säämas: Õhttvuõtt-teâđ piiđpååʹšt väʹrdd).
4. Vaʹlljed teäddõõǥǥ Päivitä yhteystietoja (säämas: Peiʹvved õhttvuõtt-teâđaid).
5. Čuäkkat neʹttpååʹštaddrõõzz da/leʹbe teʹlfon-nââmar.