Digitaalʼlaž vuõss-sâjjsažvuõtt: Ǩeeʹrj tåʹlǩ liâdǥlânji 2026

Piiđvaaldâšm da jeeʹres veʹrǧǧneeʹǩǩ ǩeeʹrjid tååimte pâi liâđǥlõʹžže pukid nåkkmid tiuddâkksaž oummid, kook tobddâʹtte Suomi.fi-tobddõõǥǥin koonn-ne veʹrǧǧneeʹǩǩ liâđǥlõʹžže äʹššõõttâmkääzzkõʹsse, ouddmiârkkan OmaVerooʹje.

Oođummuš ij kuõsk vueʹllâkksaid, ouddõsvalvvmõõžžâst åårrai leʹbe nåkkmid oummid, kook jiâ äʹššõõđ liâđǥlõʹžžen. Sij vuäǯǯa veʹrǧǧneeʹǩǩ vuõltteem pååʹšt še juätkast põʹmmaipååʹšten. Jõs âânak juʹn Suomi.fi-saaǥǥid, vuäǯǯak juätkast še ǩeeʹrjid da tuʹmmstõõǥǥid tõk liâđǥlõʹžžen.

Mäʹhtt da kuäʹss ǩeeʹrji tååimtemnääʹll mottai?

Muuttâs puätt kueʹhtten määʹttest. Jõs tuʹst jiâ veâl lääʹjj viõʹǩǩe puättmõõžž leäkku âânnmõõžžâst Suomi.fi-saaǥǥ leʹbe liâđǥlaž piiđpååʹšt, muuttâs puätt puõʹttinälla: 

Takaiääʹššlaž leʹbe tåimmnõmmpõrggi:

• Tâʹl ǥu tobddõõđak Suomi.fi-tobddõõǥǥin OmaVerooʹje leʹbe koon-ne jeeʹres veʹrǧǧneeʹǩǩ äʹššõõttâmkääzzkõʹsse 14.4.2026 leʹbe tõn mâŋŋa, vuäǯǯak jeeʹres veʹrǧǧniiʹǩǩi ǩeeʹrjid, tuʹmmstõõǥǥid da laaskid juätkast pâi liâđǥlõʹžžen Suomi.fi-saaǥǥid. Iʹlmmet neʹttpååʹštaddrõõzz Suomi.fi-saaǥǥi šiõttõõzzin, što vuäǯǯak iʹlmmtõõzzid ođđ ǩeeʹrjin neʹttpååšta. Piiđvaaldâšm ǩeeʹrjid da tuʹmmstõõǥǥid vuäǯǯak pâi OmaVerooʹje.
• Tâʹl ǥu ǩeʹrjjõõđak OmaVerooʹje 1.6.2026 leʹbe tõʹst õõudâs da vaʹlljääk hååidam jiijjan piiđaaʹššid, vuäǯǯak piiđpååʹšt pâi OmaVerooʹje. Tõid jiâ vuõlttâd teänab põʹmmaipååʹšten, håt-i leäk loopptam Suomi.fi-saaǥǥi âânnmõõžž. Iʹlmmet OmaVerost neʹttpååʹštaddrõõzz leʹbe teʹlfon-nââmar, što vuäǯǯak Piiđvaaldšmest iʹlmmtõõzz, ǥu tuʹnne lij ođđ piiđpååʹšt OmaVerost. 

Õhttõs, õutstõs, õhttsažouddõs, õhttâm leʹbe preeddan, koin lij Y-tobdldõk:

• Tâʹl ǥu õhttõõzz piiđaaʹššid håiddai ooumaž ǩeʹrjjââtt OmaVerooʹje 1.6.2026 leʹbe tõn mâŋŋa, õhttõs vuäǯǯ juätkast Piiđvaaldâšm ǩeeʹrjid da tuʹmmstõõǥǥid pâi liâđǥlõʹžžen OmaVerooʹje. Iʹlmmtõs ođđ ǩeeʹrjin puätt neʹttpååʹštest, jõs leäk iʹlmmtam neʹttpååʹštaddrõõzz OmaVerost, jõs jiõk iʹlmmet õhttvuõtt-teâđaid neʹttpååʹšt-iʹlmmtõõzzi väʹrdd, tâʹl feʹrttjak jiõčč säurrad OmaVero, što vuäǯǯak teâđ ođđ ǩeeʹrjin.
• Jõs põrggsest lij juʹn âânnmõõžžâst liâđǥlaž piiđpååʹšt, tõt vuäǯǯ še juätkast ǩeeʹrjid da tuʹmmstõõǥǥid liâđǥlõʹžžen OmaVerooʹje.

Ǩeeʹrjõõʹnni leʹbe jeeʹres peäʹlest äʹššõõtti:

Tâʹl ǥu tobddõõđak Suomi.fi-tobddõõǥǥin koon-ne veʹrǧǧneeʹǩǩ äʹššõõttâmkääzzkõʹsse 14.4.2026 leʹbe tõn mâŋŋa, vuäǯǯak personpuõttlaž veʹrǧǧneǩpååʹšt juätkast pâi liâđǥlõʹžžen Suomi.fi-saaǥǥid, håʹt-i äʹššõõđak nuuʹbb oummu leʹbe õhttõõzz peäʹlest. Iʹlmmet neʹttpååʹštaddrõõzz Suomi.fi-saaǥǥi šiõttõõzzin, što vuäǯǯak iʹlmmtõõzz ođđ ǩeeʹrjin neʹttpååʹštest. Piiđvaaldâšm ǩeeʹrjid da tuʹmmstõõǥǥid vuäǯǯak pâi Omaverooʹje. Tobddõõttmõš ij vaikkat tõn oummu veʹrǧǧneǩpååšta, koon peäʹlest äʹššõõđak.

Jõs jiõk vueiʹtt väʹldded ǩeeʹrjid vuâstta liâđǥlõʹžžen

Vuäǯǯak ǩeeʹrjid piiđvaaldšmest da jeeʹres veʹrǧǧniiʹǩǩin še juätkast põʹmmaipååʹšten, jõs jiõk tobddõõđ veʹrǧǧneeʹǩǩ liâđǥlaid äʹššõõttâmkääzzkõõzzid. Vuäitak še siirdčõõttâd liâđǥlast veʹrǧǧneǩpååʹštest põʹmmai pååšta mieʹrräiggsõʹžžen. Looǥǥ lââʹss vuäʹppõõzzin; Mõõk liâ Suomi.fi-saaǥǥ? (Suomi.fi).

Lââʹssteâđ

Muttâz vuâđđee pukid veʹrǧǧniiʹǩǩid kuõskki õõlmâslääʹǩǩšiõttummša de tõn tiuddeem jeäʹrbužlääʹǩǩšiõttummša, kååʹtt kuâskk piiđaaʹšši teâttânouddmõõžžid. Täävtõssân lij jm. pueʹreed veʹrǧǧneeʹǩǩ vuõltteem ǩeeʹrji teâttstaan, ainsmâʹtted ǩeeʹrji jåʹttlõs jååttmõš vuâsttavaʹlddi sâʹjjeempääiʹǩest huõlǩâni de noorrâd vääžnai ǩeeʹrjid seämma päikka. 

Lääʹjj puäʹtte viõʹǩǩe 14.4.2026. 

Mõõk liâ Suomi.fi-saaǥǥ? (Suomi.fi)

Halltõõzz eʹtǩǩõs eeʹttiǩ-kådda liâdǥlaž teâttanouddmõõžž vuõss-sâjjsažvuõđ veʹrǧǧneǩtåimmjummšest kuõskki lääʹjjšiõttummšen

Halltõõzz eʹtǩǩõs eeʹttiǩ-kådda liâdǥlaž teâttanouddmõõžž Piiđvaldšmest kuõskki lääʹjjšiõttummšen

Digi- da meerteâttkoontâr: Digitaalʼlaž veʹrǧǧneǩsaakkummuž vuõss-sâjjsažvuõđ toiʹmmepiijjâmhaʹŋǩǩõs, Digi vuõššân -haʹŋǩǩõs, 2024–2027