Digitaalʼlaž vuõss-sâjjsažvuõtt: Ǩeeʹrj tåʹlǩ liâdǥlânji 2026
Piiđvaaldâšm da jeeʹres veʹrǧǧniiʹǩǩi ǩeeʹrj tååimtet tåʹlǩ liâdǥlânji eeʹjjest 2026 ääʹljeeʹl pukid, kook âʹnne liâdǥlaž äʹššeemkääzzkõõzzid, diǥu OmaVero.
Ânnʼjõž pååʹšt liâdǥlaž tååimtemnääʹll vuâđđââvv miâsttmõʹšše leʹbe vaʹlljummša väʹldded âânnmõʹšše Suomi.fi-saaǥǥ leʹbe põrggâz liâdǥlaž piiđpååʹšt. Ǩiõttʼtõõllâm vueʹlnn åårrai lääʹjjšiõtteem-muttsi mieʹtt pååʹšt tååimtemnääʹll mõttjeʹči liâdǥliʹžžen pukid tõid, kook âʹnne liâdǥlaž kääzzkõõzzid. Põʹmmaiǩiiʹrjid vuäǯǯče tåʹlǩ tõk, kook jiâ ââʹn liâdǥlaž kääzzkõõzzid.
Vuâmmâž, što lääʹǩǩ ij šõõdd viõʹǩǩe veâl 12.1.2026 mâʹte ääiʹjben peäggteš. Lääʹǩǩ šâdd ärvvtõõleeʹl viõʹǩǩe alggeeʹjj 2026 äiʹǧǧen.
Mäʹhtt da kuäʹss ǩiiʹrji tååimtemnääʹll mottai?
Jõs lääʹjj viõʹǩǩe šõõddeen jiâ leäkku veâl âânnmõõžžâst Suomi.fi-saaǥǥ leʹbe põrggâz liâdǥlaž piiđpååʹšt, muuttâs šâdd puõʹttinalla:
- Personäʹššneǩ leʹbe tåimmnõmmpõõrǥâsneǩ: Ǥu ǩeeʹrjtõõđak OmaVero sizz leʹbe koozz-ne jeeʹres veʹrǧǧneeʹǩǩ äʹššeemkääzzkõʹsse alggeeʹjjest 2026, vuäǯǯak jeeʹres ǩiiʹrjid, tuʹmmstõõǥǥid da laaskid juätkast tåʹlǩ liâdǥlânji. Piiđvaaldâšm ǩiiʹrjid da tuʹmmstõõǥǥid vuäǯǯak tåʹlǩ OmaVero päikka. Vuäǯǯak iʹlmmtõõzzid ođđ ǩiiʹrjin ouddmiârkkân neʹttpååʹštin, jõs leäk iʹlmmtam neʹttpååʹštaddrõõzzad.
- Õhttsažkåʹdd, õhttsažouddõs, õhttâm leʹbe preddan, koin lij Y-tiõtt: Ǥu piiđaaʹššid håiddai ooumaž ǩeeʹrjtââʹtt OmaVero sizz alggeeʹjjest 2026, õhttsažkåʹdd, õhttsažouddõs, õhttâm leʹbe preddan vuäǯǯ juätkast Piiđvaaldâšm ǩiiʹrjid da tuʹmmstõõǥǥid tåʹlǩ liâdǥlânji OmaVero päikka. Iʹlmmtõs ođđ ǩiiʹrjin puätt neʹttpååʹšt mieʹldd, jõs leäk iʹlmmtam tõn vääras neʹttpååʹštaddrõõzzad.
Personäʹššneǩ leʹbe tåimmnõmmpõõrǥâsneǩ: Suomi.fi-saaǥǥ koʹrvvad põʹmmaiǩiiʹrjid
Jõs âânak juʹn Suomi.fi-saaǥǥid, vuäǯǯak še juätkast ǩiiʹrjid da tuʹmmstõõǥǥ liâdǥlânji.
Jõs jiõk leäkku välddam Suomi.fi-saaǥǥid âânnmõʹšše, vuäǯǯak kääzzkõõzz âânnmõʹšše alggeeʹjjest 2026 seämma-ääiʹj, ǥu tobddääk jiijjad ouddmiârkkân OmaVero sizz, Palkka.fi leʹbe puåđrekisteera. Tobddummuž õhttvuõđâst tuʹnne raajât automaattlânji liâdǥlaž pååʹštčuʹǩǩ Suomi.fi-saaǥǥid. Tät muuttâs kuâskk tiuddâkksaid privattoummuid da tåimmnõmmpõõrǥâsniiʹǩǩid.
Suomi.fi-saaǥǥ lij Digi- da meerteâttkonttâr kääzzkõs, koozz jeeʹres veʹrǧǧniiʹǩǩi vuõltteem ǩeeʹrj, tuʹmmstõõǥǥ da laask puäʹtte. Vueʹjjest vuäǯǯak Piiđvaaldâšm da määŋgai jeeʹres veʹrǧǧniiʹǩǩi vuõltteem pååʹšt juätkast tåʹlǩ liâdǥlânji. Seämma äʹšš ij puäʹđ mâʹŋŋlubust põʹmmaipååʹšten.
Suomi.fi-saaǥǥid puättam ǩiiʹrjid vuäitt lookkâd Suomi.fi-mobiilsuåvldõõzzin leʹbe neʹttseeidain suomi.fi/saaǥǥ. Piiđvaaldâšm vuõltteem ǩeeʹrj, tuʹmmstõõǥǥ da jeeʹres äʹššǩeeʹrj liâ pâi OmaVerost jeät-ǥa tõid vuõlttuku Suomi.fi:je. Kaaunak tõid OmaVerost Õhttvuõttâânnmõš-kõskklõõstâst sââʹjest Tuʹmmstõõǥǥ da ǩeeʹrj.
Vuäǯǯak teâđ ođđ ǩiiʹrjin saaǥǥin, jõs leäk iʹlmmtam tõn vääras neʹttpååʹštaddrõõzzad Suomi.fi-saaǥǥid leʹbe neʹttpååʹštaddrõõzz leʹbe teʹlfon-nââmar OmaVerost. Jõs jiõk iʹlmmet õhttvuõđteâđaid saaǥǥ vääras, tuʹst feʹrttai jiõčč seuʹrrjed Suomi.fi-saaǥǥid da OmaVero, što vuäǯǯak teâđ ođđ ǩiiʹrjin.
Jõs jiõk vueiʹt väʹldded ǩiiʹrjid vuâstta liâdǥlânji
Vuäǯǯak ǩiiʹrjid Piiđvaaldšmest da jeeʹres veʹrǧǧniiʹǩǩin še juätkast põʹmmaipååʹšten, jõs jiõk alggeeʹjjest 2026 ââʹn OmaVero di jiõk tobddâd jeeʹres äʹššeemkääzzkõõzzid.
Jõs tõn sâjja haaʹlääk seʹrdded Suomi.fi-saaǥǥin mååusat põʹmmaipååʹšt vuâsttaväʹlddjen, vuäitak iʹlmmted tõʹst Suomi.fi-saaǥǥi asetõõzzin. Vuäǯǯak kuuitâǥ Piiđvaaldâšm vuõltteem ǩiiʹrjid ooudâst liâdǥlânji, jõs leäk tobddääm OmaVero sizz alggeeʹjjest 2026. Vuäitak iʹlmmted Piiđvaldšma ouddmiârkkân OmaVerost, što jiõk ââʹn OmaVero, tõn mâŋŋa vuäǯǯak ǩiiʹrjid da tuʹmmstõõǥǥid še Piiđvaaldšmest põmmaipååʹšten.
Jõs âânak OmaVero leša jiõk Suomi.fi-saaǥǥid
Jõs leäk ǩeâlddõõttâm Suomi.fi-saaǥǥin leša tobddääk OmaVero sizz, vuäǯǯak âânnmõʹšše liâdǥlaž piiđpååʹst. Täin juuʹrdet tõn, što vuäǯǯak Piiđvaaldšem vuõltteem ǩiiʹrjid tåʹlǩ OmaVero päikka. Ǥu iʹlmmtak neʹttpååʹštaddrõõzzad leʹbe teʹlfon-nââmrad, vuäǯǯak teâđaid ođđ piiđtuʹmmstõõǥǥin, piiđkoortin, čiõlǥtõstuʹmmstõõǥǥin da jeeʹres Piiđvaaldâšm vuõltteem ǩiiʹrjin neʹttpååʹštin leʹbe teʹksttsaakkân.
Vuäitak še iʹlmmted Piiđvaldšma, jõs vuâkkad mottai jiõk-ǥa vueiʹt äʹššeed OmaVerost da väʹldded vuâstta liâdǥlaž piiđpååʹšt.
Äʹššeem nuuʹbb oummu peäʹlest OmaVerost
Jõs tuʹst lij vuõiggâdvuõtt leʹbe väʹlddvuõtt håiddad nuuʹbb oummu aaʹššid OmaVerost, vuäitak tiʹllʼjed jiijjad neʹttpååšta teâđ, ǥu nuʹbb ooumaž lij vuäǯǯam ǩeeʹrj OmaVero päikka. Vuäitak vuäǯǯad iʹlmmtõõzz täin vuõʹjjin:
- Tuʹst lij Piiđaaʹšši håiddam -väʹlddvuõtt da äʹššääk väʹlddvuõđ uuʹdi peäʹlest OmaVerost.
- Leäk vueʹllâkksa päärna huõlteei.
- Leäk privatt ouddõsǩiõčči leʹbe ouddõsǩiõččiväʹlddneǩ.
Ǥu tuʹst lij Piiđaaʹšši håiddam -väʹlddvuõtt da vuäǯǯak teâđ nuuʹbb oummu piiđpååʹštest liâdǥlânji, tõt ij vaaikât tõõzz, mõõn-nalla ooumaž jiõčč vuäǯǯ Piiđvaaldâšm vuõltteem ǩiiʹrjid. Persoonlaž piiđpååʹšt tååimtemnääʹll mottai põʹmmjest liâdǥliʹžžen tåʹlǩ tâʹl, ǥu väʹlddvuõđ uʹvddi jiõčč ǩeʹrjtââʹtt OmaVero sizz da äʹššai kääzzkõõzzâst jiijjâs aaʹššin.
Väʹlddneʹǩǩen vuäitak še iʹlmmted OmaVerost, što ooumaž, ǩeän aaʹššid hååidak, ij ââʹn OmaVero.
Jõs oummust lij Piiđvaaldâšm äʹššneǩrekisteera miõrkkum ääʹššhåiddai, tuʹmmstõõǥǥ da ǩeeʹrj tååimtet tåʹlǩ ääʹššhåiddja soorčǩani tõʹst, äʹššad-a ooumaž jiõčč OmaVerost.
Põõrǥâsäʹššneeʹǩǩ: Liâdǥlaž piiđpååʹšt koʹrvvad põʹmmaiǩiiʹrjid
Jõs põrggâz liâdǥlaž piiđpååšt lij juʹn âânnmõõžžâst, põõrǥâs vuäǯǯ še juätkast ǩiiʹrjid da tuʹmmstõõǥǥid liâdǥlânji OmaVero päikka.
Alggeeʹjjest 2026 ääʹljeeʹl liâdǥlaž piiđpååʹšt vuäǯǯa OmaVero sizz ǩeʹrjtõõttâm õhttvuõđâst âânnmõʹšše puk
- õhttsažkååʹdd, diǥu vueʹssbieʹllõhttõõzz, õõlmâs õhttsažkååʹdd, õhttõõzz da foond
- õhttsažouddõõzz
- õhttâm
- preddan, koin lij Y-tiõtt da ääʹššhåiddjest Suomi-väʹlddvuõtt Piiđaaʹšši håiddmõš.
Vueʹjjest serddmõš liâdǥlaž piiđpååšta šâdd seämma-ääiʹj, ǥu ooumaž, ǩeäʹst lij nõõmǩeeʹrjtemvuõiggâdvuõtt leʹbe Piiđaaʹšši håiddam -väʹlddvuõtt, tobddââtt OmaVero sizz da vaalaš liiŋk "Äʹššed põrggâz peäʹlest".
Seämma poodd lij vääžnai iʹlmmted neʹttpååʹštaddrõs, koozz Piiđvaaldâšm vuõlttad teâđ, ǥu OmaVerost liâ ođđ tuʹmmstõõǥǥ leʹbe ǩeeʹrj. Jõs jiõk iʹlmmet õhttvuõđteâđääd saaǥǥ vääras, tuʹst feʹrttai jiõčč seuʹrrjed OmaVero, što vuäǯǯak teâđaid ođđ ǩiiʹrjin.
Piiđvaaldâšm vuõltteem ǩeeʹrj liâ OmaVerost. Kaaunak tõid OmaVerost Õhttvuõttâânnmõš-kõskklõõstâst sââʹjest Tuʹmmstõõǥǥ da ǩeeʹrj. Seämma äʹšš ij puäʹđ mâʹŋŋlubust põʹmmaipååʹšten
Lââʹssteâđ
Muttâz vuâđđâʹvve ǩiõttʼtõõllâm vueʹlnn åårrai veʹrǧǧniiʹǩǩid kuõskki takailääʹjjšiõttummša di tõn tiuddeei Piiđvaaldâšm spesiaal-lääʹjjšiõttummša. Täävtõssân lij jeäʹrbi mieʹldd pueʹreed veʹrǧǧniiʹǩǩi vuõltteem ǩiiʹrji teâtt–tuõrv, ainsmâʹtted ǩiiʹrji jåʹttlõs jååttmõš vuâsttavaʹlddja sâjjõõzzâst soorčǩani di noorrâd tääʹrǩes ǩiiʹrjid seämma päikka.
Laaʹjjin lij miârktõs šõddâd viõʹǩǩe alggeeʹjjest 2026.
Suomi.fi-saaǥǥ da liâdǥlaž piiđpååʹšt – mii mottai eeʹjjest 2026?
VM 23.10.2025: Piiđtuʹmmstõõǥǥ uuʹdet juätkast vuõss-sââʹjest liâdǥlânji
Halltõõzz eʹtǩǩõs eeʹttiǩ-kådda liâdǥlaž teâttanouddmõõžž Piiđvaldšmest kuõskki lääʹjjšiõttummšen