Go mávssát bálkká, almmut dieđuid boahtoregistarii 1.1.2019 rájes

Boahtoregisttar lea álbmotlaš elektrovnnalaš diehtovuođđu, mii váldo geavahussii 1.1.2019 Suomas. Boahtoregistarii (www.tulorekisteri.fi) almmuhuvvojit 1.1.2019 maŋŋá máksojuvvon bálká- ja dienasboađut. Buot bargoaddit (stuorra ja smávva fitnodagat dahje ovdamearkan dállodoallobargoaddit) almmuhit dás ovddos áiggi dásis leahki dieđuid boahtoregistarii. Mávssu máksi, ovdamearkan bargoaddi, lea geatnegas almmuhit dieđuid máksojuvvon bálkkáin.

Dieđut, mat almmuhuvvojit boahtoregistarii leat bargojuvvon barggus máksojuvvon bálkkát, lunddolaš ovddut, mávssut, bargobuhtadusat sihke eará dienasboađut. Maiddái vearuhis  ja vearuvuloš goluid buhtadusaid galgá almmuhit. Boahtoregistarii  almmuhuvvojit máksojuvvon beaiveruđat, málesbuhtadusat ja kilomehterbuhtadusat. Boahtoregistarii almmuhuvvon dieđuide ii leat euromearrásaš vuollerádjá, muhto buot bálkádieđuid galgá almmuhit.

Dieđut almmuhuvvojit viđa beaivvi siste máksinbeaivvis

Dieđut addojuvvojit boahtoregistarii  guvttiin iešguđetlágan almmuhusain. Bálkádiehtoalmmuhus addojuvvo juohke bargis ja juohke bálkábeaivvis sierra. Bargoaddi sierraalmmuhus addojuvvo guđege fitnodagas oktii mánotbajis.

Bálkádiehtoalmmuhusa galgá addit viđa kaleandarbeaivvi siste máksinbeaivvis. Máksinbeaivvin oaivvilduvvo bálkábeaivi dahjege dat beaivi, go máksu lea boađuoažžu geavahusas. Maiddái deivvolaš bargoaddin doaibmi fitnodat galgá addit dieđuid "máksinbeaivi + 5 beaivve" -prinsihpain.

Bargoaddi sierraalmmuhus addojuvvo čuovvovaš kaleandarmánotbaji 5. beaivve das go bálká lea máksojuvvon. Bargoaddi sierraalmmuhussan almmuhuvvojit máksojuvvon bargoaddi buohcooadjomávssuid oktasaš lohku ja das vejolaččat dahkkon geahpádusat. Vearrohálddahusa bargoaddiregistarii gullevaš bargoaddi galgá dán lassin addit "Ii bálkkámáksin" -dieđu, jos bálkkát eai leat máksojuvvon gažaldatvuloš mánu áigge. Deivvolaš bargoaddi galgá addit boahtoregistarii  bargoaddi sierraalmmuhusa dušše daid manotbajiin, main dat máksá bálkká.

Almmut elektrovnnalaččat – báhpáriin sáhttá almmuhit dušše erenoamáš sivas

Elektrovnnalaš áššiid dikšun lea boahtoregistara vuođđoeaktu, ja dieđuid sáhttá dás ovddos almmuhit báberskovin dušše erenoamáš sivas. Erenoamáš sivvan sáhttášii doallat diliid, mas ii govttolaččat sáhttášii gáibidit dieđuid addima elektrovnnalaččat. Ná lea ovdamearkka dihtii dalle, go lunddolaš olbmos, jápminbeasis, deivvolaš bargoaddis dahje olgoriikka olbmos ii leat vejolašvuohta addit dieđuid elektrovnnalaččat. Dieđuid ii sáhte almmuhit boahtoregistarii maiddái telefonis. Dieđuid ii sáhte almmuhit friijahápmásaččat, muhto ferte geavahit boahtoregistara almmuhuskanálaid.

Sávahahtti ja álkkimus lea almmuhit dieđuid boahtoregistarii  njuolgga bálkávuogádagas ng. teknihkalaš rádjágierraga mielde. Leage buorre čielggadit iežas bálkávuogádaga doaimmaheaddjis, leago bálkávuogádahkii boahtimin boahtoregisttarbeaivideapmi ja mo dieđuid lea ulbmil sirdit boahtoregistarii.

Elektrovnnalaš bálkárehkenastimii ja almmuheapmái sáhttá oahpásmuvvat erenoamážit smávvafitnodatolbmuide ja dállodoaluide oaivvilduvvon nuvttá Palkka.fi-bálvalusas, mii lea lágas mearriduvvon eiseváldebálvalus. Palkka.fi-bálvalusas lea vejolaš rehkenastit fitnodagaid bálkkáid, ja 1.1.2019 rájes bálvalus almmuha dieđuid njuolgga boahtoregistarii. Sierra almmuhusa boahtoregistarii  ii nappo dárbbaš.

Dieđuid sáhttá almmuhit boahtoregistarii  maiddái boahtoregistara elektrovnnalaš áššiid dikšun bálvalusas juogo luđemin dieđuid vuorkán dahje biebmamin dieđuid manuálalaččat fierbmeskovvái.  Boahtoregistara elektrovnnalaš áššiid dikšun bálvalussii identifiserejuvvo juogo bálvalusas Suomi.fi-fápmudusat dahje Katso-bálvalusas fitnodathámi mielde. Olgoriikkalaš fitnodagat ja olgoriikkalaš fitnodagaid olgoriikkalaš ovddasteaddjit (lunddolaš olbmot) identifiserejit iežaset Katso-bálvalusas.

Loga lasi Suomi.fi-bálvalusas

Loga lasi Katso-bálvalusas

 

Sávahahtti lea almmuhit dieđuid  boahtoregistarii  njuolgga bálkávuogádagas teknihkalaš rádjágierraga mielde. Jos dieđuid almmuheapmái geavahuvvo boahtoregistara elektrovnnalaš áššiid dikšun bálvalusa, sáhttá fitnodaga nammačállinvuoigatvuođalaš, beaivválaš jođiheaddji, beaivválaš jođiheaddji sadjásaš dahje priváhta ealáhusbargi fápmudit ovdamearkan rehketdoallodoaimmahaga almmuhit dieđuid iežas beales boahtoregistarii.

Fápmudusa sáhttá dahkat 8.8.2018 rájes bálvalusas Suomi.fi-fápmudusat dahje Katso-bálvalusas fitnodathámi mielde.

Bálkádieđuid almmuheapmi sirdašuvvá boahtoregistarii  – eará almmuhuskanálat eai leat šat geavahusas

Maŋimuš bálkkáid jahkealmmuhusat addojuvvojit dálá vugiin jagis 2018 Vearrohálddahussii, bargoealáhatlágádusaide, Bargguhisvuođaoadjoruhtarádjui ja bargobárteoadjujeaddjiide sierra. 1.1.2019 rájes bálkádieđuid almmuhangieđahallan nuppástuvvá, ja dieđut 1.1.2019 maŋŋá máksojuvvon mávssuin addojuvvo realaáigásaččat ovtta čohkkejuvvon registarii. Geavahussii váldin guoská buot bálkámáksiid sirdásanáiggiid haga.

Ovdal 1.1.2019 máksojuvvon mávssuid almmuheapmi ja divvumat dahkkojuvvojit guđege eiseváldái sierra. Leage sivva váldit vuhtii, ahte jagi 2019 bargoaddit galget addit almmuhusaid sihke boahtoregistarii ahte sierra eará eiseválddiide jagis 2018 ja jagiin dás ovdal.