Sämikielâlâš ášástâllâm Viäruhaldâttuvâst sämmilij päikkikuávlu ulguubeln

Taan ravvust muštâlum vuovvijn monâttâlloo talle, ko sämmilâš kiävttá Viäruhaldâttuvâst ášástâldijnis jieijâs viärutmân kyeskee ääšist sämikielâ eres saajeest ko säämi kielâlaavâ uáivildem päikkikuávlust. Monâttâllâm kuáská puoh Viäruhaldâttuv ohtâduvváid já toimâsoojijd.

Raavâ lii tärkkilistum säämi kielâlaavâ (1083/2003) 3 §:n tohhum nubástus keežild.

1 Almolâš

Säämi kielâlaavâ (1086/2003) 2 § 1 moomeent 7-uási mield virgeomâhâžžân, moos säämi kielâlaahâ heiviittuvvoo, annoo meiddei Viäruhaldâttâh.

Sämikieláin uáivilduvvoo säämi kielâlaavâ 3 § 1 moomeent mield anarâškielâ, nuorttâlâškielâ tâi tavesämikielâ.

Sämmiliist lii säämi kielâlaavâ 4 já 12 § mield vuoigâdvuotâ kevttiđ jieijâs viärutmân kyeskee ääšist tâi ääšist, mast sun kulloo, Viäruhaldâttuvâst jo-uv suomâkielâ tâi sämikielâ. Viäruhaldâttâh fáálá sämikielâlii palvâlus tâi tulkkum puoh sämmiláid, kiäh almotteh halijdiđ kevttiđ Viäruhaldâttuvâst ášástâldijnis sämikielâ. Ulmust lii vuoigâdvuotâ kevttiđ ášástâldijnis sämikielâ, veikâ suu eenikielâ aalmugtiätuvuáháduv mield lii suomâkielâ, ko kyevti- tâi maaŋgâkielâlâš ulmui lii máhđulâš merkkiđ aalmugtiätuvuáhádâhân tuše oovtâ eenikielâ.

Juuriidlijn ulmuin, moi pevdikirjekielâ lii sämikielâ, lii säämi kielâlaavâ 5 § mield sullâsâš vuoigâdvuotâ kevttiđ virgeomâháin ášástâldijnis kevttiđ pevdikirjekielâs hiäivulij oosijn čuávudijn tom, mii 4 §:st asâttuvvoo sämmilij vuoigâdvuođâst kevttiđ sämikielâ.

2 Vuoigâdvuotâ tulkkuumân sämmilii ášástâldijn Viäruhaldâttuvâst

Jis sämmilâš kiävttá ášástâldijnis sämmilij päikkikuávlu ulguubeln leijee Viäruhaldâttuv toimâsaajeest (ovdâmerkkân viärukorttâäšistis tâi viäru perâmân lahtojeijee äšistis) sämikielâ, sust lii sämikielâ mättee ulmuu váiludijn säämi kielâlaavâ 19 § mield vuoigâdvuotâ tulkkuumân sämikielân.

Viäruhaldâttâh uárnee ääši kieđâvuššâm várás njálmálii puhelimáin tábáhtuvvee tulkkum. Táárbu mield ääši kieđâvuššâm sirdoo ja sajan puáhtá tiiláđ sämikielâ tuulhâ. Viäruhaldâttâh máksá tulkkumkoloid.

Tavesämikielân kyeskee tulkkumaašijn váldoo vuosâsaajeest ohtâvuotâ Tave-Suomâ viärutoimâttâhân. Viäruhaldâttâh lii toohâm toimânkoččomsopâmuš sämikielâ tulhâiguin ovdeláá uáivildum palvâlusâi pyevtitmist. Koččâmušâst leijee tuulhah láá adelâm sopâmuššáin syeligâsâsttoollâmčonnâsem.

3 Sämikielâlij viäruttemäššikiirjij kieđâvuššâm já äššikiirjij jurgâlem

Jis sämmilâš äššiuásálâš eres ko sämmilij päikkikuávlust táttu säämi kielâlaavâ 20 § mield uážžuđ viäruääši kieđâvušmân lahtojeijee äššikiirjijd sämikielâlâžžân tâi säämi kielâlaavâ 4 § mield kyeđđiđ jieijâs viäruáášán kyeskee äššikiirjijd sämikielâlâžžân, ääši išedeijee valmâštâllâm puáhtá sirdeđ Tave-Suomâ viärutoimâttuv pargon.

Sämmilii äššiuásálii viäruáášán kyeskee ääši kieđâvuššâm puáhtá vaattâđ säämi kielâlaavâ 20 §:st asâttum suomâkielâlii äššikirje jurgâlem sämikielân tâi táárbu mield jurgâlem sämikielâst suomâkielân. Tave-Suomâ viärutoimâttâh huolât äššikiirjij jurgâlmist kevttimáin táárbu mield iššeen sämikielâ kielâtoimâttuv kielâjurgâleijeid. Viäruhaldâttâh máksá jurgâlem tovâttem koloid.

4 Sämikielâliih palvâlusah

Tave-Suomâ viärutoimâttâh tuáimá oles riijkâ sämikielâlii palvâlus toorjâohtâdâhhân. Tiäđuh sämikielâlijn palvâlusâin kávnojeh čujottâsâst vero.fi/samegillii.