Ovdavearut 2018 - lunddolaš olbmot

Ovdavearru berrojuvvo boađuin, main ii doaimmahuvvo ovdavearrogeassin.

Ovdavearu vuođuštusat

Ovdavearru berrojuvvo oaiveopmodatboađuin ja dienasboađuin. Ovdavearut vuođđuduvvet váldooasis jagi 2016 loahpalaš vearuhusa dieđuide, mat leat rievdaduvvon čuovvovaččat:

  • ealáhusdoaimma boađut leat bajiduvvon 10,0 %:in
  • láigoboađut leat bajiduvvon 5,0 %:in
  • ovdavearroguoddima vuollásaš bálkáboađut ja bálvalanruđat leat bajiduvvon 2,0 %:in, jagi 2017 dieđut 1,0 %:in.

Earát go ovdalis máinnašuvvon boađut eai leat bajiduvvon.

Jos ovdavearru lea rievdaduvvon jagi 2017 áigge, de boahtodiehtun leat geavahuvvon jagi 2017 ovdavearu rievdadanrehkenastima dieđut. Jos ovdavearu vuođđun adnojuvvon dieđut leat ilmmuhuvvon jahkái 2018, de boahtodiehtun leat adnojuvvon ilmmuhuvvon dieđut.

Ealáhusdoaimma ja eanandoalu oaiveopmodat- ja dienasboađut vuođđuduvvet jagi 2016 loahpalaš vearuhusa dehe jagi 2017 ovdabearrama rievdadanrehkenastima dieđuide.

Ovdavearuid rehkenastimis boahtun eai leat váldon vuhtii ossodatgotti máksin badjebáhcagat ja juogadusat, jos dat vuođđuduvvet loahpalaš vearuhusa dieđuide. Juogadusat ja ossodatgotti máksin badjebáhcagat leat váldon vuhtii vearrogoartta rehkenastimis dušše, jos jagi 2017 ovdabearrama rievdadanrehkenastimiin dehe jahkái 2018 ilmmuhuvvon dieđuin leat leamaš fárus ruovttueatnama juogadusat, olgoriikkain ožžojuvvon almmolaččat noterejuvvon fitnodaga juogadusat dehe ossodatgotti máksin badjebáhcagat.

Almmolaččat noterejuvvon fitnodaga juogadusain máksi geassá 25,5 % ovdavearu. Earágo go almmolaččat noterejuvvon fitnodaga juogadusain, máksi geassá 7,5 %:a ovdavearu. Dain osiin go juogadus manná badjel 150 000 euro, ovdavearru lea 28 %. Ovdavearru rehkenastojuvvo juogadusaid oktasaš logus, ii dušše vearuvuloš oasis. Bivdde dárbbu mielde vearrogoartta earás go almmolaččat noterejuvvon fitnodagas du oažžun juogadusa várás. Ilmmut dalle earás go almmolaččat noterejuvvon fitnodagas du oažžun dienas- ja oaiveopmodatboahtojuogadusa brutton. Ilmmut oaiveopmodatboahtojuogadussan dan oasi juogadusain, mii lea 8 % ossosiid matematihkalaš árvvus. Ilmmut 8 % badjelmanni oasi dienasboahtojuogadussan.

Lassidiehtu juogadusboađuid vearuhusas

Ovdavearru almmolaččat noterejuvvon ossodatgotti máksin badjebáhcagiin lea 25,5 %. Ovdavearru eará go almmolaččat noterejuvvon ossodatgotti máksin badjebáhcagiin lea 7,5 %, jos seamma ossodatgottis vearrojagi oažžun badjebáhcagiid mearri lea oktiibuot eanemusat 5000 euro. Ráji badjelmanni oasis ovdavearru lea 25,5 %. Badjebáhcaga juohkki ossodatgoddi čuovvu seamma oažžui iežas máksin badjebáhcagiid 5000 euro ráji badjel mannama. Bivdde dárbbu mielde vearrogoartarievdadusa earás go almmolaččat noterejuvvon ossodatgottis oažžun badjebáhcaga várás.

Buohcanoaju buohccedikšunmáksu ja beaiveruhtamáksu fitnodatolbmuin

Buohcanoadjomáksu juohkása buohcanoaju buohccedikšunmáksui ja buohcanoaju beaiveruhtamáksui. Buohccedikšunmáksu rehkenastojuvvo fitnodatolbmuin dađi lági mielde, ahte FEL- (fitnodatolbmuid ealáhatlága) dahje EFEL – (eanandolliid ealáhatlága) oajus meroštallon bargoboahtu buhtte fitnodatdoaimmas ožžojuvvon bálkkáid ja dienasboađuid. Eará bálkkát ja dienasboađut váldojuvvojit rehkenastimii fárrui dakkárin. Geahpádusat rehkenastojuvvojit ja geahpeduvvojit dán boahtovuođuštusas, goas ožžojuvvo buohccedikšunmávssu rehkenastimis vuođuštussan geavahuvvon vearuvuloš boahtu. EFEL-oadjuduvvon veahkkeruđa oažžus váldojuvvo vuhtii maiddái EFEL-bargoboahtu buohccedikšunmávssu ja beaiveruhtamávssu rehkenastimis. Buohccedikšunmáksu bálká- ja bargoboađus lea 0 %.

Earáin go fitnodatolbmuin dahje EFEL-oadjuduvvon veahkkeruđa oažžuin buohccedikšunmáksu 1,36 % rehkenastojuvvo gielddavearuhusas vearuvuloš dienasboađu vuođul. Buohccedikšunmávssu bajideapmi 0,17 % rehkenastojuvvo dakkár ealáhat-, ovdu- ee. boađuid vuođul, main ii mearriduvvo beaiveruhtamáksu.

Beaiveruhtamáksu lea 1,53 % ja dan rehkenastimis FEL- dehe EFEL-bargoboahtu buhtte fitnodatdoaimmas ožžojuvvon bálkkáid ja fitnodatdoaimma dienasboađuid. FEL-bargoboađus rehkenastojuvvo fitnodatolbmo bajiduvvon beaiveruhtamáksu 0,17 %. Beaiveruhtamáksu ii rehkenastojuvvo, jos jahkásaš bálká- ja bargoboađu oktasaš lohku manná 14 020 euro vuoli.

Ovdavearroguoddimis heivehanvuloš vearrovuođut

  • Jagi 2018 boahtovearroceahkkálas
  • Gielddaid ja searvegottiid boahtovearroproseanttat jahkái 2018
  • Rájálaččat vearrogeatnegasa gielddavearru 19,75 %
  • Buohccedikšunmáksu 0 %/1,36 % + 0,17 %
  • Beaiveruhtamáksu 0 %/1,53 % + 0,17 %
  • Riikarádiovearru 2,50 %
  • Oaiveopmodatboađuid boahtovearroproseanta lea 30 %. Dain osiin go vearuvuloš oaiveopmodatboađu mearri manná badjel 30 000 euro, de oaiveopmodatboađus máksojuvvo vearru 34 %:a mielde

Ovdavearu buorrin lohkan ja ádjánančuovvumušat

Jagi 2018 áigge ovdavearuid buorrin lohkan ja ádjánančuovvumušaid meannudeapmi rievdá.

Jagi 2018 rájes máksit mearriduvvon ovdavearru lohkkojuvvo buorrin vearrogeatnegasa vearuhusas dan sturrosažžan go dat lea mearriduvvon máksojuvvot. Jos vearrojagi 2018 ovdavearru guđđojuvvo mávssekeahttá, de dasa rehkenastojuvvo ja berrojuvvo ádjánanreantu dehe maŋŋonanreantu dakkaviđe čuovvovaš beaivvi rájes gitta dan beaivái, goas dat máksojuvvo. Reanttu rehkenastin rievdá 1.11.2018 fápmui boahtti láhkarievdadusa čuovvumuššan dađi lági mielde, ahte mávssekeahtes ovdaverrui, mas lea earrebeaivi, rehkenastojuvvo ádjánanreanttu sajes maŋŋonanreantu.

Mávssekeahttá guđđojuvvon ovdavearru ja dan maŋŋonančuovvumušat sihkkojuvvojit vearuhusa ollašuhttima olis, jos ovdavearru ii dárbbašuvvo vearrojagi vearu máksun. Ádjánanreantu ja maŋŋonanreantu lea 7,0 % jagi 2018. Mávssekeahttá guđđojuvvon ovdavearru sáhttá berrojuvvot maiddái bággobearrama bokte juo vearrojagi áigge.

Ovdavearu earit

Uhcimus mearriduvvon máksima várás biddjon ovdavearru lea 170 euro. Máksineriid mearis ja bearranmánuin mearriduvvo Vearrohálddahusa mearrádusain. Earit ja bearranmánut leat čuovvovaččat:

Täytä tähän taulukon kuvaus, esteettömyyttä silmälläpitäen, ei näy kuin ruudunlukijoille
Ovdavearu
mearri, euro
Ovdavearu
eriid mearri 
Bearranmánut
170,00–500,00 2 njukčamánnu ja čakčamánnu
badjel 500,00 muhto eanemusat 1 700,00 3 guovvamánnu, suoidnemánnu ja skábmamánnu
badjel 1 700,00 muhto eanemusat
10 000,00
6 guovvamánnu, cuoŋománnu, geassemánnu, borgemánnu, golggotmánnu ja juovlamánnu
badjel 10 000,00  12 ođđajagemánnu-juovlamánnu

Geahča dárkileappot Vearrohálddahusa mearrádusa lunddolaš olbmo ja jápminbeasi ovdavearu vuollerájis ja bearraneriin (29.8.2017/605).

Ovdavearu rievdadeapmi

Ovdavearu rievdadeami meannudeapmi earáhuvvá vearrojagi 2018 rájes.
Vearrojagi 2018 ovdavearru sáhttá rievdaduvvot dehe dat sáhttá sihkkojuvvot áššehasa gáibádusa mielde vearuhusa nohkama rádjái.

Vuođuštussan ovdavearu vuolideapmái sáhttá leat omd. ealáhusdoaimma boađu mávssolaš vulosguvlui mannan. Áššehis ovdavearru sáhttá sihkkojuvvot ovdal gažaldatvuloš vearrojagi vearuhusa nohkama.

Ovdadievasmahttinmávssu sáhttá máksit dušše 31.10.2018 rádjái. Ovdabearran sáhttá 1.11.2018 rájes dievasmahttojuvvot nu ahte ohccojuvvo ovdavearru ja vearrojagi maŋŋel bivdojuvvo, ahte Vearrohálddahus mearrida vearrojagi nohkama maŋŋel ovdavearu dehege lassiovdamávssu, main lea earrebeaivi. Vearrojagi 2018 lassiverrui galgá máksojuvvot geahpiduvvon maŋŋonanreanttu, jos dan earrebeaivi lea 1.2.2019 dehe dan maŋŋel.

Sáhtát bivdit rievdadusa ovdaverrui Vearrogoarta fierpmis -bálvalusas, telefuvnna bokte riŋgemiin nummárii, mii lea ovdavearus mearrideami vuollásažžan, dehe nu ahte doaimmahat ovdavearu rievdadanohcamuša man beare vearrodoaimmahahkii. Skábmamánu álggu rájes 2018 rievdadusat ovdaverrui dahkkojuvvojit OmaVero (sámás: IežasVearru) -bálvalusas.

Vearrogoartaohcamuš ja ovdavearroohcamušskovit leat oažžunsajis vearrodoaimmahagain sihke čujuhusas vero.fi/lomakkeet. Ale lavtte ohcamuššii kontuosirdinskoviid, daningo ovdavearu earit leat fámus dassážii go oaččut vejolaš buhttejeaddji kontusirdinskoviid.

Vearrogoartaohcamuš ja ovdavearroohcamuš (5010)

Ovdabearranregisttar

Ovdavearru gessojuvvo maiddái bargobuhtadusain (barggus máksojuvvon buhtadus, mii ii leat bálká), jos mávssu oažžu ii leat merkejuvvon ovdabearranregisttarii. Registrerema sáhttá dárkkistit Fitnodatdiehtovuogádagas čujuhusas www.ytj.fi. Bálkkás galgá goitge álot gessojuvvot ovdavearru.

Vaikko ovdabearranregisttarii merkekeahtes olbmui máksojuvvon bargobuhtadusain galgá gessojuvvot ovdavearru, de sutnje lea sáhttán mearriduvvot maiddái ovdavearru. Jos ovdavearru lea áššeheapme dahje liiggás stuoris, de Vearrohálddahus njulge ovdavearu áššehasa čilgehusa vuođul.

(Ovdal Vearrohálddahusa olggosaddin 60)